თბილისი, 3 ოქტომბერი — Sputnik. ტაქსების რეგულაციის რეფორმას უფლებადამცველი ბაია პატარაია სოციალურ ქსელში ეხმაურება, ტაქსის რეგულაციის გენდერულ ანალიზს აკეთებს და ქალებს აფრთხილებს.
უფლებადამცველი ფიქრობს, რომ რეფორმის შედეგად ფერადი ტაქსი საცნობ ნიშანს თავზე ვერ დაიდგამს, მაგრამ მაინც იტაქსავებს.
„ანუ ყველა მანქანას დავუქნევ ხელს და მერე „უზნაჩოკო“ ტაქსი გამიჩერებს, თუ ვიღაც სირბანჯო, რომელსაც უცბად გართობა მოუნდა, როგორ გავიგო? ვერ გავიგებ. აწი, ყველა მანქანას შეუძლია ტაქსად მიასაღოს თავი ქალს და მერე ხან ფასიანი და ხანაც უფასო სექსი შესთავაზოს (რაც არც აქამდე გვაკლდა)“, – წერს პატარაია.
მისი თქმით, ასე ქალები უფრო მოწყვლად სიტუაციაში აღმოჩნდებიან სექსუალური შევიწროების მიმართ. ამიტომ ქალებს ურჩევს, მოიმარაგონ სმარტფონები და გადაიღონ მგზავრობა ვიდეოთი, თან იქონიონ ელ.შოკი, სპრეი, ჯაყვა და იარონ კარატეზე.
სამშაბათიდან თბილისის ყველა ტაქსი უნდა იყოს ორი კატეგორიის - А და В. A კატეგორიის ლიცენზია მათთვისაა განკუთვნილი, ვისთვისაც ტაქსის მძღოლობა შემოსავლის მთავარი წყაროა. მათი ავტომობილები აუცილებლად თეთრი ფერის უნდა იყოს. ისინი მგზავრების აყვანას შეძლებენ როგორც ქუჩაში, ისე გამოძახებით – ტაქსების სხვადასხვა კომპანიასთან თანამშრომლობის საფუძველზე.
А კატეგორიის მძღოლებს მნიშვნელოვანი პრივილეგიები ექნებათ. ისინი მანქანაზე რეკლამის განთავსების სანაცვლოდ შეძლებენ უფასოდ გადაღებონ მანქანა და ისარგებლონ ქიმწმენდით, ასევე მათთვის სპეციალურად გამოყოფილი პარკირების ადგილებით სარგებლობას.