თბილისი, 9 მაისი — Sputnik. უზენაესი სასამართლოს ყოფილი თავმჯდომარე ნინო გვენეტაძე თბილისის სახელმწიფო უნივერსიტეტის პრორექტორი გახდა.
საქართველოს სასამართლოების შესახებ სკანდალური კანონპროექტი ძალაში შევიდა >>
გვენეტაძე უზენაეს სასამართლოს 2015 წლის მარტიდან 2018 წლის 2 აგვისტომდე ხელმძღვანელობდა. თანამდებობიდან წასვლა მან ჯანმრთელობის მდგომარეობით ახსნა.
„ეს არის ძალიან საპასუხისმგებლო და მნიშვნელოვანი თანამდებობა. მეც გახლავართ თსუ-ს პროფესორი და მიხარია, რომ ის იქნება ჩემი კოლეგა. აქედან გამომდინარე, მთელი სულით და გულით ვულოცავ“, - განუცხადა ჟურნალისტებს პარლამენტის თავმჯდომარემ ირაკლი კობახიძემ.
გვენეტაძე 1964 წლის 27 იანვარს დაიბადა. არის ქართულ-ამერიკული უნივერსიტეტის (GAU) პროფესორი, თბილისის სახელმწიფო უნივერსიტეტის ასოცირებული პროფესორი, ასევე სამაგისტრო და სადოქტორო პროგრამების ხელმძღვანელი.
გვენეტაძე იყო „რესპუბლიკური პარტიის“ წევრი, რომელიც 2016 წლის ბოლო საპარლამენტო არჩევნებამდე „ქართული ოცნების“ მმართველ კოალიციაში შედიოდა. არჩევნებისთვის კოალიცია დაიშალა და გამარჯვება პარტია „ქართული ოცნება - დემოკრატიულმა საქართველომ“ მოიპოვა.
