თბილისი, 7 თებერვალი — Sputnik. საქართველოს სახალხო დამცველის აპარატი კრწანისის ეროვნულ სასწავლო ცენტრში მომხდარ ინციდენტს შეისწავლის, რომლის დროსაც ახალწვეული ელჯან ეფენდიევი დაშავდა, განაცხადა ომბუდსმენმა ნინო ლომჯარიამ ჟურნალისტებთან.
კონფლიქტი სამხედრო მოსამსახურეებს შორის ოთხშაბათს, საღამოს მოხდა.
„კრწანისის სასწავლო ცენტრში სამხედრო მოსამსახურეებს შორის სიტყვიერი შელაპარაკება მოხდა. ერთ-ერთი ახალწვეული რუსთავის კლინიკაში გადაიყვანეს, მას არანაირი ფიზიკური დაზიანებები არ აქვს", – ნათქვამია თავდაცვის სამინისტროს მიერ გავრცელებულ განცხადებაში.
თავად ეფენდიევი და მისი ნათესავები კი ამტკიცებენ, რომ იგი სცემეს.
„ჩემი შვილი დაახლოებით სამი დღეა, რაც კრწანისის საწვრთნელ ცენტრში მსახურობს. რაც შეეხება ჩხუბს, ის საავადმყოფოში გადმოყვანის შემდეგ თვითონ დამიკავშირდა. მითხრა, რომ ის სხვა ოთახში გაიყვანეს და, სავარაუდოდ, რამდენიმე პირმა სცემა. დაზიანებები თავის არეში მიაყენეს“, – განაცხადა ეფენდიევის მამამ Rustavi2-ის ეთერში.
ინციდენტს უკვე სწავლობს თავდაცვის სამინისტროს სამხედრო პოლიცია.
სამხედრო თავიდან რუსთავის საავადმყოფოში, შემდეგ კი გორის სამხედრო ჰოსპიტალში გადაიყვანეს.
