თბილისი, 11 მაისი — Sputnik. მეორე მსოფლიო ომის ვეტერანების პენსია გაორმაგდება, განაცხადა საქართველოს პრემიერ-მინისტრმა გიორგი კვირიკაშვილმა.
დღეისთვის ასაკობრივი პენსიონერების პენსია 180 ლარს შეადგენს, საარსებო მინიმუმი კი 177 ლარია.
საქართველოს მთავრობის მეთაურმა მეორე მსოფლიო ომის ვეტერანებთან შეხვედრას, რომელიც 9 მაისს ვაკის პარკში გაიმართა, „ძალიან ამაღელვებელი და ემოციურად დატვირთული დღე" უწოდა.
„ისინი არიან ღვაწლმოსილი გმირები, როლებმაც საკუთარი სიცოცხლე არ დაიშურეს თავიანთი ქვეყნის გადასარჩენად და რა თქმა უნდა, იმსახურებენ განსაკუთრებულ პატივისცემას, არიან განსაკუთრებული ადამიანები — უკვე ხანდაზმულები, თუმცა ძალიან მეომრული შემართებით", — პრემიერის სიტყვებს ციტირებს მთავრობის პრეს-სამსახური.
კვირიკაშვილის განცხადებით, 9 მაისს, პრაქტიკულად მთელი დღე მან ვეტერანებთან ერთად გაატარა, სხდომის დაწყებამდე კი ეკონომიკური გუნდის წარმომადგენლებთან გამართა თათბირი.
„მინდა, გამოვაცხადო ჩვენი მხრიდან ნაბიჯი, რომელიც გარკვეულწილად ჩვენი ქვეყნის მადლიერებას გამოხატავს ამ ადამიანების მიმართ. მინდა, რომ მეორე მსოფლიო ომის ვეტერანებს გავუორმაგოთ პენსია", — აღნიშნა პრემიერმა.
ვეტერანთა კავშირის ინფორმაციით, ამ დროისთვის საქართველოში მეორე მსოფლიო ომის 676 მონაწილე ცხოვრობს.
