თბილისი, 20 ივნისი — Sputnik. რუსთავის რაიონულმა პროკურატურამ, ადგილობრივ მცხოვრებს ძაღლის მიმართ სასტიკი მოპყრობის ფაქტზე ბრალდება წარუდგინა, ნათქვამია საქართველოს მთავარი პროკურატურის ვებ-გვერდზე გამოქვეყნებულ განცხადებაში.
საუბარია ინციდენტზე, რომელიც რუსთავში გასული კვირის ბოლოს მოხდა. გამოძიების მონაცემებით, ბრალდებულმა ბერიტაშვილის ქუჩის ეზოში ძაღლს რამდენჯერმე დაარტყა ჯოხი, რომელზეც დამაგრებული იყო ლურსმანი.
ძაღლმა წამებას ვერ გაუძლო და მოკვდა.
პროკურატურამ ბრალდების საქმეზე სასამართლოს უკვე მიმართა და აღკვეთის ღონისძიების სახით 5000 ლარის ოდენობით გირაოს შეფარდებას მოითხოვა.
სისხლის სამართლის საქმე სსკ-ის 259-ე მუხლის პირველი ნაწილით აღიძრა (ცხოველისადმი სასტიკი მოპყრობა), რაც ისჯება ჯარიმით ან გამასწორებელი სამუშაოთი ვადით ერთ წლამდე.
