თბილისი, 16 მაისი — Sputnik. ბერძნულ-რომაული სტილით მოჭიდავე ზურაბ დათუნაშვილს, რომელიც თბილისის ერთ-ერთ ღამის კლუბში ცივი იარაღით დაჭრეს, სამშაბათს საავადმყოფოდან გაწერენ, აცნობეს "Sputnik-საქართველოს" საქართველოს ჭიდაობის ფედერაციაში.
ინციდენტი სამი დღის წინ თბილისში მოხდა. დათუნაშვილი დანით მიყენებული ჭრილობით თბილისის პირველ კლინიკურ საავადმყოფოში გადაიყვანეს. ამჟამად სპორტსმენის ჯანმრთელობას საფრთხე არ ემუქრება.
ინციდენტის დროს დაშავდა ზურაბ დათუნაშვილის ძმაც — გიორგი, რომელიც ასევე საქართველოს ეროვნული ნაკრების წევრია.
საქართველოს ჭიდაობის ფედერაციაში არ გაუკეთებიათ კომენტარი იმასთან დაკავშირებით, შეძლებს თუ არა ევროპის ორგზის ჩემპიონი ზურაბ დათუნაშვილი მსოფლიო ჩემპიონატზე წასვლას, რომელიც პარიზში აგვისტოში გაიმართება.
დათუნაშვილი ევროპის ჩემპიონი მაისის დასაწყისში სერბეთის ქალაქ ნოვი-სადში გამართულ ტურნირზე გახდა. ფინალში 25 წლის დათუნაშვილმა ბელარუსი რაძიკ კულიევი დაამარცხა ანგარიშით 4:2, ორი წლის წინ მოპოვებული ტიტული დაიცვა და ევროპის ორგზის ჩემპიონი გახდა.
