თბილისი, 11 იანვარი — Sputnik. აჭარის მთავრობის თავმჯდომარემ ზურაბ პატარაძემ ბათუმის ბულვარის დირექტორის თანამდებობაზე ეთერ მაჭუტაძე დანიშნა, ნათქვამია ბათუმის ბულვარის ადმინისტრაციის „ფეისბუქის“ გვერდზე.
პატარაძემ ბულვარის ყოფილ უფროსს ცისკარ გოგიტიძეს გაწეული სამუშაოსთვის მადლობა გადაუხადა და ახალ სამსახურში წარმატებული საქმიანობა უსურვა.
ეთერ მაჭუტაძე აგრარულ მეცნიერებათა დოქტორია. 2012 წლიდან ბათუმის გამწვანებისა და ლანდშაფტების დაგეგმარების სამსახურის უფროსად მუშაობდა. დამთავრებული აქვს ვორონეჟის მოროზოვის სახელობის სატყეო-ტექნოლოგიური უნივერსიტეტი. წლების განმავლობაში მუშაობდა ბათუმის ბოტანიკური ბაღის მთავარ აგრონომად, შემდეგ კი დირექტორად.
ეთერ მაჭუტაძე არის 25-მდე სამეცნიერო პუბლიკაციისა და ნაშრომის ავტორი, რაც წლების განმავლობაში სხვადასხვა სამეცნიერო ჟურნალ-გაზეთებში ქართულ და რუსულ ენებზე ქვეყნდებოდა.