თბილისი, 12 აპრილი – Sputnik. რუსეთში დაარეგისტრირეს კორონავირუსული ინფექციის სამკურნალო პრეპარატი „მირ-19“, შესაბამისი დოკუმენტი „როსპატენტმა“ გასცა. ამის შესახებ რუსეთის ფედერალური სამედიცინო-ბიოლოგიური სააგენტოს ვებ-გვერდზეა ნათქვამი.
პრეპარატის სახელწოდება „მირ“ იშიფრება როგორც „მცირე ინტერფერირებადი რიბონუკლეინის მჟავა“. ესაა SARS-CoV-2-ის წინააღმდეგ ანტივირუსული მოქმედების კომბინირებული პრეპარატი. მისი გამოყენება ხდება ინჰალაციის გზით ან ინტრანაზალური მეთოდით.
სამკურნალო საშუალება შემუშავებულია სააგენტოს ხელმძღვანელის ვერონიკა სკვორცოვას დავალებით, რომელმაც განაცხადა, რომ ცხოველებსა და უჯრედულ კულტურაზე ჩატარებული ცდების დროს პრეპარატმა უსაფრთხოება და მაღალი ეფექტიანობა აჩვენა. მოხერხდა ვირუსული დატვირთვის 10000-ჯერ შემცირება, რაც სამკურნალო საშუალებას ფაქტობრივად „ანტიდოტად“ აქცევს.
ცდების მეორე ფაზაში 50 მოხალისე მონაწილეობდა. სკვორცოვამ ასევე განაცხადა, რომ „მირ-19“-ის კვლევების დროს არ გამოვლენილა არანაირი გვერდითი ეფექტი, ხოლო თავად პრეპარატი კორონავირუსული ინფექციის განვითარების ყველაზე მძიმე ფორმების პრევენციას ახდენს.
