თბილისი, 25 მარტი — Sputnik. ჩუმაკოვის ცენტრში ოფიციალურად დაიწყო ვაქცინა „კოვივაკის“ წარმოება, იუწყება РИА Новости რუსეთის განათლებისა და მეცნიერების სამინისტროს პრესსამსახურზე დაყრდნობით.
ამპულების პირველი პარტიის შეფუთვა უწყების ხელმძღვანელმა ვალერი ფალკოვმა ჩაუშვა, რომელმაც საუწყებო ჯილდოებიც გადასცა ჩუმაკოვის ცენტრის თანამშრომლებს და დიდი მადლობაც გადაუხადა მათ „შესანიშნავი რეზულტატებისთვის“.
„ამგვარად, სამოქალაქო ბრუნვაში მესამე რუსული ვაქცინა გამოდის, რომელიც უახლოეს ხანებში გამოჩნდება რეგიონებში“, — ნათქვამია რელიზში.
პრეპარატის ფასი, რომელიც სუსპენზიის სახით გამოვა კუნთებში ინექციისთვის,
ათ ამპულაზე 4 330 რუბლია (დაახლოებით 188 ქართული ლარი).
ჩუმაკოვის ცენტრში კარგ შეფასებას აძლევენ „კოვივაკით“ ვაქცინირებულ მოხალისეებში გამომუშავებული ანტისხეულების დონეს და შემოდომაზე აპირებენ დოკუმენტების შეტანას ჯანდაცვის მსოფლიო ორგანიზაციაში პრეკვალიფიკაციისთვის.
„კოვივაკი“ ეგრეთ წოდებული მთელვირიონული ვაქცინაა. ის ვირუს SARS-CoV-2–ს ეფუძნება, რომელიც სპეციალურადაა იმგვარად დამუშავებული, რომ წართმეული აქვს ინფექციური თვისებები. თუმცა იმავდროულად ინარჩუნებს იმუნური რეაქციის გამოწვევის უნარებს.
ასეთი პრეპარატები ვირუსული ნაწილაკის ცილის მთელ ნაკრებს შეიცავს და შესაბამისად იმუნური პასუხიც, როგორც მოსალოდნელია, უფრო სრული იქნება.
მანადე გავრცელდა ინფორმაცია, რომ პრეპარატ „კოვივაკს“ საფუძვლად დაედო შტამი, რომელიც მოსკოვის „კომუნარკის“ საავადმყოფოში ერთ–ერთ პაციენტს აუღეს.
„კოვივაკმა“ რეგისტრაცია თებერვალში გაიარა. წლის ბოლომდე ათ მილიონამდე დოზის დამზადება იგეგმება.
