"სანამ ჩვენ შევქმნით სარეზერვო სამსახურის კონცეფციას, ჯერ ის უნდა განვსაზღვროთ, რისთვის გვჭირდება ის — ბუნებრივი კატასტროფების და ტერორისტული აქტების შედეგების თუ სამხედრო საფრთხეების აღსაკვეთად. წარმოდგენილ დოკუმენტში მე ეს ვერ გავარკვიე", — აღნიშნა პოლიტოლოგმა თავდაცვის სამინისტროს მიერ პარლამენტში წარდგენილ სამხედრო ძალების რეზერვის განვითარებისა და მართვის კონცეფციაზე საუბრისას.
განახლებული კონცეფციის თანახმად, რეზერვის დაკომპლექტების ასაკი 18-55 წლებით განისაზღვრება და იგი როგორც რეზერვისტის სახელფასო უზრუნველყოფას, ასევე კანონმდებლობით დადგენილ სახელმწიფო სოციალურ გარანტიებს განაპირობებს.
აქტიური სარეზერვო სამსახური სამი კომპონენტისგან იქნება შედგენილი, ესენია: შეიარაღებული ძალების რეზერვი, ტერიტორიული რეზერვი და სპეციალისტების რეზერვი. სამივე ტიპის რეზერვს თავის სპეციფიკური დანიშნულება ექნება.
მოქალაქეებისთვის რეზერვის გავლა ნებაყოფლობითი იქნება. რეზერვისტები ორი სახის მომზადებას გაივლიან, საბრძოლო ინტენსიურსა და სამობილიზაციო მოკლევადიანს.
