თბილისი, 28 დეკემბერი – Sputnik. ოპოზიციური პარტიის „ევროპული საქართველო - მოძრაობა თავისუფლებისთვის“ ერთ-ერთი ლიდერი ელენე ხოშტარია პარტიას ტოვებს, იუწყება „რუსთავი2“.
ელენე ხოშტარია საკუთარი გადაწყვეტილების მიზეზებზე 15:00 საათზე პარტიის ოფისში ბრიფინგზე ისაუბრებს.
„ევროპული საქართველოს“ წევრის ლევან თარხნიშვილის განცხადებით, პარტიაში დაპირისპირება არ ყოფილა.
„როგორც ვიცი, ელენე ხოშტარია თვითონ აპირებს განცხადების გაკეთებას. დავუტოვოთ უფლება, თვითონ თქვას, რას აპირებს და როგორ აპირებს. ნამდვილად არ ვაპირებ სხვის მაგივრად ვილაპარაკო. უაღრესად დადებითი პიროვნება, ჩემი ახლო ადამიანი და მეგობარია და ასეთად დარჩება, მიუხედავად მისი გადაწყვეტილებისა, რასაც დღის განმავლობაში გაიგებთ“, – განაცხადა თარხნიშვილმა.
გავრცელებული ინფორმაციით, „ევროპული საქართველოდან" წასვლის შემდეგ ელენე ხოშტარია არც ერთ პარტიაში არ აპირებს გაწევრიანებას და ის თავად შექმნის ახალ პოლიტიკურ პლატფორმას. ერთ-ერთი ვერსიით კი, ის არასამთავრობო ორგანიზაციაში გააგრძელებს საქმიანობას.
ელენე ხოშტარია 2016-2020 წლებში იყო საქართველოს მეცხრე მოწვევის პარლამენტის წევრი პარტიული სიით, საარჩევნო ბლოკიდან „ერთიანი ნაციონალური მოძრაობა“. 2017 წელს თბილისის მერობის კანდიდატი იყო „ევროპული საქართველოდან“, იყო ამავე პარტიის კანდიდატი 2020 წლის საპარლამენტო არჩევნებში ვაკის მაჟორიტარულ ოლქში.
