თბილისი, 10 ოქტომბერი - Sputnik. საქართველოს პრემიერ-მინისტრმა, გიორგი გახარიამ მესტიაში - ამბროლაურის, ონის, ცაგერის, მესტიისა და ლენტეხის მაჟორიტარი დეპუტატობის კანდიდატი, გოჩა ენუქიძე წარადგინა და ადგილობრივ მოსახლეობას სიტყვით მიმართა, - ამის შესახებ ინფორმაცია პრემიერ-მინისტრის ფეისბუქ გვერდზე გავრცელდა.
პრემიერ-მინისტრმა სიტყვით გამოსვლისას ყურადღება გაამახვილა იმ ფაქტზე, რომ მთა არის და უნდა გახდეს ქვეყნის სიძლიერის ერთ-ერთი ყველაზე მნიშვნელოვანი არგუმენტი.
„ჩვენი მთავარი მიზანია, რომ ყველგან - მთაშიც, ბარშიც, თბილისშიც, მესტიაშიც, ბათუმშიც, რუსთავშიც ახალგაზრდებს ჰქონდეთ ერთი და იგივე შესაძლებლობები, ჩვენს ღვაწლმოსილ მოხუცებს ჰქონდეთ ერთნაირი შესაძლებლობები - როგორც საპენსიო, ჯანდაცვის მიმართულებით, არ უნდა იყოს სხვაობა. ეს იქნება ეკონომიკურად ძლიერი, დემოკრატიული საქართველო, სადაც სვანეთისმაგვარი კუთხეები იმ მრავალფეროვნებას შეიტანენ არამხოლოდ საქართველოს გამდიდრებისთვის, არამედ ევროპის გამდიდრებისთვის“, - განაცხადა გახარიამ.
პრემიერის განცხადებით, ბოლო წლების განმავლობაში სვანეთის ინფრასტრუქტურაში დაახლოებით 150 მილიონზე მეტი ჩაიდო, მაგრამ ეს საკმარისი არ არის.
„შემიძლია გითხრათ, რომ მომავალი ოთხი წლის განმავლობაში, ინფრასტრუქტურულ პროექტებში მთავრობა 20 მილიარდ ლარს ჩადებს. ამ თანხის დიდი ნაწილი მიმართული იქნება მესტიისა და სვანეთისკენ“, - განაცხადა პრემიერმა.
მისივე თქმით, 2021 წლიდან 24 საათიანი წყალმომარაგების საკითხის მოგვარება დაიწყება და ამავე წელს დასრულდება. ამასთან, დაიწყება და დასრულდება ლენტეხის დამაკავშირებელი გზის რეაბილიტაცია, ისევე როგორც ზუგდიდი-ჯვარი-მესტიის გზა, რომელსაც ასევე რეაბილიტაცია სჭირდება.
საპარლამენტო არჩევნები საქართველოში 31 ოქტომბერს გაიმართება. მათში მონაწილეობას 50 პარტია და ორი ბლოკი მიიღებს. ამომრჩევლებს მოუწევთ 150 დეპუტატის არჩევა - 120-ის პროპორციული სისტემით და 30-ის - მაჟორიტარულით.
