ხმაური პარლამენტთან: ოპოზიცია აქცია-პერფორმანსს მართავს

© Sputnik / Vladimir Umikashviliაქცია პარლამენტთან
აქცია პარლამენტთან - Sputnik საქართველო
გამოწერა
პარლამენტის შენობასთან ერთ-ერთ კედელზე ბოტასები და მოკლული ახალგაზრდების ფოტოები გამოჩნდა – აქციის მონაწილეები ასე ხვდებიან საქართველოს გენერალური პროკურორის თანამდებობაზე ირაკლი შოთაძის წარდგენას.

თბილისი, 17 თებერვალი — Sputnik. პარლამენტის წინ ოპოზიციური პარტიებისა და სამოქალაქო მოძრაობის აქტივისტები დილიდან შეიკრიბნენ, რათა აქცია-პერფორმანსით პროტესტი გამოხატონ გენერალური პროკურორის პოსტზე ირაკლი შოთაძის წარდგენის გამო.

დღეს პარლამენტის იურიდიულ საკითხთა კომიტეტის სხდომაზე დეპუტატებმა შოთაძეს უნდა მოუსმინონ.

ირაკლი შოთაძე - Sputnik საქართველო
დეპუტატების წინაშე ირაკლი შოთაძის გამოსვლა ოპოზიციის აქციის ფონზე გაიმართება

აქციის წევრებმა საკანონმდებლო ორგანოსთან მიიტანეს ბოტასები, როგორც სიმბოლო შოთაძის გენპროკურორობის პერიოდში დაშვებული შეცდომებისა და „შოთაძის პოლიტიკის" მსხვერპლთა ფოტოები – პანკისის ხეობაში სპეცოპერაციის დროს მოკლული 19 წლის თემირლან მაჩალიკაშვილის, თბილისში, ხორავას ქუჩაზე მოკლული 16 წლის დავით სარალიძის, ასევე დეკანოზ გიორგი მამალაძისა და აზერბაიჯანელი ჟურნალისტის აფგან მუხთარლის ფოტოები.

„ჩვენ პარლამენტში შესვლა გვსურდა, რათა შოთაძისთვის კონკრეტულ საქმეებზე კითხვები დაგვესვა – იმ საქმეებთან დაკავშირებით, რაზეც ბევრი კითხვა არსებობს და რასთან დაკავშირებითაც პროტესტი გაჩნდა. ამ ადამიანების ნაწილს დღეს თქვენ აქ ხედავთ. შოთაძე დამნაშავეა, რომელმაც გააყალბა აფგან მუხთარლის, თემირლან მაჩალიკაშვილის საქმეები, ხორავას ქუჩაზე მომხდარი დავით სარალიძის მკვლელობის საქმე, დეკანოზ გიორგი მამალაძის საქმე და ა.შ. რა თქმა უნდა, ეს ყოველივე შოთაძეს არ შერჩება. იგი ამ თანამდებობაზე ყოველთვის არ იქნება", – განაცხადა არასამთავრობო ორგანიზაცია "სამართალდამცველთა რეფორმების ცენტრის" ხელმძღვანელმა ზვიად კუპრავამ.

აქციაზე სამართალდამცველებსა და აქტივისტებს შორის მცირე დაპირისპირება მოხდა.

დღეს პარლამენტში იურიდიულ საკითხთა კომიტეტის სხდომაა ჩანიშნული, რომელზეც დეპუტატები ირაკლი შოთაძეს, როგორც გენერალური პროკურორობის კანდიდატს მოუსმენენ.

გენპროკურორის პოსტი 2019 წლის დეკემბერში გახდა ვაკანტური, მას შემდეგ, რაც ყოფილმა გენერალურმა პროკურორმა შალვა თადუმაძემ უზენაეს სასამართლოში გადაინაცვლა და სისხლის სამართლის კოლეგიას ჩაუდგა სათავეში.

ირაკლი შოთაძემ გენპროკურორის თანამდებობაზე სამი წელი იმუშავა – 2015 წლის ნოემბრიდან 2018 წლის მაისამდე. ირაკლი შოთაძემ თანამდებობა 2018 წელს დატოვა საზოგადოების ზეწოლის ფონზე, მას შემდეგ, რაც პროკურატურამ არასრულწლოვანი დავით სარალიძის მკვლელობაში ბრალდებულის ბრალის დამტკიცება ვერ შეძლო.

ყველა ახალი ამბავი
0