თბილისი, 26 მაისი — Sputnik. 400-მდე ახალწვეულმა სამხედრო ფიცი დადო თბილისში, თავისუფლების მოედანზე დამოუკიდებლობის დღეს. ახალწვეულებს საქართველოს პრეზიდენტმა გიორგი მარგველაშვილმა მიულოცა, რის შემდეგაც საქართველოს ჰიმნი გაისმა.
სადღესასწაულო ღონისძიებას ესწრებოდნენ საქართველოს პირველი პირები, მთავრობის წევრები, საქართველოს კათოლიკოს-პატრიარქი, დიპკორპუსის წარმომადგენლები და თბილისში გახსნილი ნატოს საპარლამენტო ასამბლეის საგაზაფხულო სესიის მონაწილეები.
საქართველო 26 მაისს დამოუკიდებლობის დღეს აღნიშნავს. ამ დღეს 1918 წელს საქართველოს პირველმა დემოკრატიულმა მთავრობამ, ნოე ჟორდანიას ხელმძღვანელობით, ქვეყნის დამოუკიდებლობა გამოაცხადა. დამოუკიდებელმა რესპუბლიკამ მხოლოდ ორნახევარი წელი იარსება, თუმცა საქართველოში ის დღემდე ახსოვთ.
დილიდან საქართველოს დედაქალაქსა და რეგიონებში სადღესასწაულო ღონისძიებები მიმდინარეობს.