ნინი რაზმაძე
– საბა, რამდენი ხანია რაც კუნგ- ფუს საბრძოლო ხელოვნებით დაინტერესდი?
– სპორტის ამ სახეობით უკვე 4 წელია ვარ დაკავებული. პირველად როცა ვარჩევდით სპორტის სახეობებს, ბაბუამ მიმიყვანა უშუზე და ძალიან მომეწონა და გადავწყვიტე კუნგ-ფუში დამეწყო ვარჯიში.
– პირველი ტურნირი რომ გაიხსენო, როგორი იყო შენი ემოციები?
– 2016 წელს თბილისში ჩატარდა საქართველოს უშუს ჩემპიონატი, რომელშიც გავიმარჯვე და ძალიან გახარებული ვიყავი. თუმცა, რადგან ეს ჩემი პირველი ტურნირი იყო. ძალიან ვნერვიულობდი.
– მოგვიყევი ტურნირებზე..
– მონაწილეობა მიღებული მაქვს საქართველოს ჩემპიონატებზე, თბილისში საერთაშორისო ჩემპიონატზე, ერევანში ევრო ვარსკვლავთა თასზე და მსოფლიო ჩემპიონატზე ჩინეთში, რომელიც ქალაქ ემეიშენში გაიმართა. რაც შეეხება ჯილდოებს, მიღებული მაქვს - საქართველოს თასი, საერთაშორისოზე მეორე–მესამე ადგილები ავიღე, სომხეთში გამართულ ჩეჯიბრზე 2 ოქრო და 1 ვერცხლი მოვიპოვე, ხოლო ჩინეთში 2 ოქროს მედლის მფლობელი გავხდი.
– რა სირთულებთან არის დაკავშირებული კუნგ-ფუს საბრძოლო ხელოვნება?
– ყველა საბრძოლო ხელოვნება, რა თქმა უნდა, დაკავშირებულია სირთულეებთან. მაგრამ თავდაუზოგავი შრომით შეიძლება მიაღწიო წარმატებას. შინაგანად ყოველთვის ვცდილობ ვიყო მობილიზებული და ამაღლებული განწყობა მქონდეს. დღის განმავლობაში 6 საათს ვვარჯიშობ, რის გამოც უფრო მეტად თავდაჯერებული გავხდი და ყოველ შეჯიბრზე გასვლის წინ ნაკლებად ვღელავ.
– შენთვის ყველაზე მნიშვნელოვანი, ალბათ, მსოფლიო ჩემპიონატზე გასვლა იყო.
– დიახ, ჩემთვის ყველაზე დასამახსოვრებელი, საპასუხისმგებლო და სასიხარულო იყო მსოფლიო ჩემპიონატი, სადაც მე გავხდი მსოფლიო ჩემპიონი. ტურნირისთვის დიდი მონდომებით ვემზადებოდი, დღეში 6-7 საათსს ვვარჯიშოვდი და ვფიქრობ, ეს შრომა დამიფასდა. ვცდილობდი მიმეღწია წარმატებისთვის. გამოვედი ორ სახეობაში და მოვიპოვე 2ოქროს მედალი. სიმართლე გითხრათ, გამარჯვების იმედიც მქონდა.
– ტურნირის შესახებ მოგვიყევი...
– შეჯიბრი ჩატარდა ჩინეთის ქალაქ ემეიშანში, რომელშიც 50 ქვეყნის 5 ათასი სპორტსმენი მონაწილეობდა, კონკურენცია დიდი იყო, მაგრამ მე მივაღწიე კარგ შედეგს. გამოვდიოდი ტაოლუში საჩვენებელ გამოსვლაში გრძელ იარაღში, გუნშუ ში და ტაოლუ უიარაღო გამოსვლაში – ტრადიციული სტილი ჩაციუანიში.
– როგორი შეგრძნებაა, როცა ამდენ სპორტსმენს შორის ასეთ პატარა ასაკში იმარჯვებ?
– რა თქმა უნდა, შეგრძნება ძალიან სასიხარულოა. გამარჯვების შემდეგ საქართველოს უშუს ფედერაციის პრეზიდენტმა გიორგი ვერულიძემ შემაქო, რაც ძალიან გამიხარდა.
– რა იყო ყველაზე რთული ჩემპიონატზე?
– ჩემპიონატის სირთულე მდგომარეობდა იმაში, რომ საკმაოდ ბევრი ძლიერი მოწინააღმდეგე იყო. მათგან ამერიკელ სპორტსმენს ს გამოვყოფდი, რომელიც საკმაოდ ძლიერი კონკურენტი იყო.
– კუნგ-ფუს გარდა, კიდევ რით ხარ დაკავებული?
– ჯერჯერობით სპორტის სხვა სახეობით არ ვარ დაინტერესებული, ვაპირებ საბრძოლო ხელოვნებას ბოლომდე გავყვე.
– სამომავლო გეგმები – რა ტურნირები გელის და როგორ ემზადები?
– ვარჯიშს მუდმივ რეჟიმში გავაგრძელებ, სექტემბერში დაგეგმილია საერთაშორისო ჩემპიონატი, რომელშიც მონაწილეობის მიღებას ვაპირებ. იმედი მაქვს, ამ ტურნირზეც კარგ შედეგს დავდებ.