თბილისი, 20 აპრილი — Sputnik. თბილისში, მუხრანის ქუჩაზე ბუნებრივი აირის მილი დაზიანდა, რის შედეგადაც ძლიერი გაჟონვა მოხდა, იუწყება საზოგადოებრივი მაუწყებლის პირველი არხი.
შემთხვევა რამდენიმე საათის წინ მოხდა. გავრცელებული ინფორმაციით, გაზის მილის დაზიანება მანქანის შეჯახებამ გამოიწვია.
შინაგან საქმეთა სამინისტროს ცნობით, შესაბამისმა სამსახურებმა დროულად მოახერხეს მილის გადაკეტვა, თუმცა უსაფრთხოების მიზნით მიმდებარე ტერიტორიაზე მცხოვრები მოსახლეობის ევაკუაცია მაინც განხორციელდა.
რაც შეეხება ავტომობილის მძღოლს, იგი ადგილიდან მიიმალა და მის დასაკავებლად ღონისძიებები მიმდინარეობს.
ამ დროისათვის გაზის მილი უკვე გადაკეტილია, ხოლო მოსახლეობა სახლებში დაბრუნდა.
გაზსადენის დაზიანების გამო სანზონის მოსახლეობის ნაწილს გაზმომარაგება შეუწყდა. საუბარია 6000-მდე აბონენტზე.
კომპანია „თბილისი ენერჯის“ ინფორმაციით, მოსახლეობისთვის ბუნებრივი გაზის მიწოდება ხვალ, 10:00 საათიდან ეტაპობრივად აღდგება.
