თბილისი, 12 თებერვალი — Sputnik. სამართალდამცველებმა ნარკოტიკული საშუალების უკანონო შეძენა-შენახვა-გასაღების ბრალდებით ფონიჭალაში 27 წლის მამაკაცი დააკავეს, ნათქვამია შინაგან საქმეთა სამინისრტოს მიერ გავრცელებულ განცხადებაში.
სამართალდამცველებმა, მოსამართლის განჩინების საფუძველზე, ბრალდებულისგან ნარკოტიკული საშუალებების საკონტროლო შესყიდვა განახორციელეს და ფარულად აუდიო-ვიდეოჩანაწერი გააკეთეს.
პოლიციამ უკანონოდ გაყიდული, დიდი ოდენობით ნარკოტიკული საშუალება "ჰეროინი" ნივთმტკიცებად ამოიღო.
უწყების ინფორმაციით, დაკავებული წარსულში ქურდობის, ძარცვისა და ნარკოდანაშაულისთვის ნასამართლევი პირია.
დიდი ოდენობით ნარკოტიკული საშუალების არაერთგზის უკანონო შეძენა-შენახვის და გასაღების ფაქტებზე გამოძიება საქართველოს სსკ-ის 260-ე მუხლის მესამე და მეხუთე ნაწილებით მიმდინარეობს. დანაშაული 5-დან 14 წლამდე ვადით თავისუფლების აღკვეთას ითვალისწინებს.