თბილისი, 24 აგვისტო - Sputnik. სამართალდამცველებმა ქურდობის მცდელობის ფაქტზე 15 წლის გ.გ დააკავეს, ნათქვამია შსს-ს მიერ გავრცელებულ განცხადებაში.
როგორც გამოძიებით დადგინდა, დაკავებული თბილისში, ჭავჭავაძის გამზირზე მდებარე მაღაზია iTechnics-ის გაქურდვას ცდილობდა.
პოლიციამ გ.გ. მაღაზიის მიმდებარე ტერიტორიაზე დანაშაულის ჩადენის დროს დააკავა.
სამართალდამცველებმა დანაშაულის ჩადენის დროს გამოყენებული ხელთათმანები, ნიღაბი და ხელჩანთა ნივთმტკიცების სახით ამოიღეს.
გამოძიება ქურდობის მცდელობის ფაქტზე მიმდინარეობს, საქართველოს სისხლის სამართლის კოდექსის 19-177-ე მუხლით. დანაშაული 4-დან 7 წლამდე ვადით თავისუფლების აღკვეთას ითვალისწინებს.
მუსიკის ფესტივალზე ტელეფონების ქურდობისთვის 18 წლის მამაკაცი დააკავეს >>
აღსანიშნავია, რომ მიმდინარე წლის ივლისში მსგავსი ფაქტი მოხდა iTechnics-ის პეკინის ქუჩაზე მდებარე ფილიალში. დაკავებულები 18 და 19 წლის ახალგაზრდები იყვნენ.