თბილისი, 10 ივლისი — Sputnik. თბილისში საყოფაცხოვრებო ტექნიკის მაღაზია „ბეკოს" ერთ-ერთი ფილიალი გაქურდეს, იუწყება ტელეკომპანია Rustavi2.
შემთხვევა გლდანში დღეს, 06:00 საათზე მოხდა.
გავრცელებული ინფორმაციით, მაღაზიიდან წაღებულია 30-მდე მობილური ტელეფონი, რომელთა საერთო ღირებულება რამდენიმე ათას ლარს აღწევს.
ქურდები, სავარაუდოდ, არასრულწლოვანები არიან.
შემთხვევის ადგილზე საპატრულო პოლიცია და ექსპერტ-კრიმინალისტები იყვნენ მობილიზებული. ამ დროისთვის მიმდინარეობს საგამოძიებო მოქმედებები. გავრცელებული ინფორმაციით, დანაშაულის ჩამდენი პირები უკვე დადგენილი არიან.
„ბეკოს" გლდანის ფილიალი ერთი თვის წინ, 13 ივნისსაც გაქურდეს. ქურდებმა მაშინაც მობილური ტელეფონები წაიღეს. სავარაუდოდ, ორივე დანაშაული ერთი და იმავე არასრულწლოვნების მიერაა ჩადენილი.
მომხდარ ფაქტზე გამოძიება საქართველოს სსკ-ის 177-ე მუხლით მიმდინარეობს.
