თბილისი, 7 დეკემბერი — Sputnik. შინაგან საქმეთა სამინისტროს სამცხე-ჯავახეთის პოლიციის დეპარტამენტის თანამშრომლებმა ქალაქ ნინოწმინდასთან ჯგუფურად ჩადენილი ქურდობის ბრალდებით სამი პირი ცხელ კვალზე დააკავეს, ნათქვამია შსს-ს პრეს-სამსახურის მიერ გავრცელებულ განცხადებაში.
გამოძიებით დადგინდა, რომ შპს „დემირიოლ სერვისის" თანამშრომლებმა მიმდინარე წლის 21 ნოემბერს ბაქო-თბილისი-ყარსის რკინიგზის მარაბდა-კარწახის მონაკვეთზე ამავე კომპანიის კუთვნილი რელსები მოიპარეს.
სამართალდამცველებმა ნაქურდალი რელსები ნივთმტკიცებად ამოიღეს.
გამოძიება სსკ-ის 177-ე მუხლის მე-3 ნაწილის „ა" ქვეპუნქტით მიმდინარეობს, რაც ჯგუფის მიერ ჩადენილ ქურდობის ფაქტს გულისხმობს და ითვალისწინებს ოთხიდან შვიდ წლამდე თავისუფლების აღკვეთას.
კომპანია „დემირიოლ სერვისი" რამდენიმე წლის განმავლობაში ბაქო-თბილისი-ყარსის რკინიგზის მშენებლობაზე მუშაობდა.
ბაქო-თბილისი-ყარსის რკინიგზა აზერბაიჯანი-საქართველო-თურქეთის სახელმწიფოთაშორისი ხელშეკრულების საფუძველზე აშენდა. ბაქო-თბილისი-ყარსის მარშრუტის სიგრძე 846 კილომეტრს შეადგენს.
შოთა ნოზაძე
