თბილისი, 4 ოქტომბერი — Sputnik. საქართველოს ფინანსთა სამინისტროს საგამოძიებო სამსახურმა სახელმწიფო მიწების მითვისების ფაქტზე 14 ადამიანი სისხლის სამართლის პასუხისგებაში მისცა, ნათქვამია უწყების განცხადებაში.
გამოძიებით დადგინდა, რომ აღნიშნულმა პირებმა სხვადასხვა პერიოდში დაამზადეს 1997-1998 წლებით დათარიღებული ყალბი დოკუმენტები, რომელშიც ნათქვამია, რომ მათ სახელმწიფოსგან პირად სარგებლობაში მიწის ნაკვეთები მიიღეს.
„ყალბი დოკუმენტების გამოყენებით ბრალდებულებმა სოფელ ნატახტარში, საგურამოსა და სოფელ დიღომში 45,6 ათასი კვადრატული მეტრი ფართობი ტერიტორია დაირეგისტრირეს. უკანონოდ მითვისებული ქონების ღირებულება დაახლოებით 1 მლნ ლარია", — ნათქვამია განცხადებაში.
მოცემულ მომენტში მიწების დაბრუნებისა და დანაშაულში მონაწილე სხვა პირების გამოვლენის პროცესი მიმდინარეობს.
გამოძიება „თაღლითობის" და „ყალბი დოკუმენტის, ბეჭდის, შტამპის ან ბლანკის დამზადება, გასაღება ან გამოყენების" მუხლით მიმდინარეობს, რაც ექვსიდან ცხრა წლამდე ვადით თავისუფლების აღკვეთას ითვალისწინებს.
