თბილისი, 21 აგვისტო — Sputnik. თურქეთში საქართველოს საკონსულოს არ მიუღია ინფორმაცია საქართველოს მოქალაქეების შესახებ, რომლებიც დაშავდნენ ანტალიასთან მომხდარი ავტოავარიის დროს, იუწყება საინფორმაციო სააგენტო Новости-Грузия საგარეო საქმეთა სამინისტროს პრეს-სამსახურზე დაყრდნობით.
ორშაბათ დილით თურქეთის ქალაქებს, ანტალიასა და ქემერს შორის გადაბრუნდა ტურისტული ავტობუსი 27 მგზავრით, იუწყება Sputnik Turkey. მასმედიის ინფორმაციით, ტრავმები მიიღო სულ მცირე ექვსმა მგზავრმა.
"ამჟამად საკონსულოში საქართველოს მოქალაქეების შესახებ ინფორმაცია არ შემოსულა. კონსული მუდმივ კავშირზეა შესაბამის ორგანოებთან", — განაცხადა საქართველოს საგარეო საქმეთა სამინისტროს პრეს-სამსახურის თანამშრომელმა.
ავტობუსი ადგილობრივი და უცხოელი ტურისტებით ქალაქ ბელეკში მიემართებოდა. სატრანსპორტო საშუალება გვირაბიდან გამოსვლისას გადაბრუნდა.
