00:22 21 ოქტომბერი 2019
პირდაპირი ეთერი
  • EUR3.3088
  • 100 RUB4.6461
  • USD2.9718
 ნიკა მელია

ნიკა მელიას საქმე: მოსამართლემ ბრალდებული გააძევა, შუამდგომლობა კი არ დააკმაყოფილა

© Sputnik / Alexander Imedashvili
საქართველოში
მოკლე ბმულის მიღება
98 0 0

მოსამართლის თქმით, რისკები, რომლებიც მანამდე არსებობდა ბრალდებული დეპუტატის მიმართ, კვლავ შენარჩუნებულია.

თბილისი, 10 ოქტომბერი — Sputnik. თბილისის საქალაქო სასამართლომ დეპუტატ ნიკა მელიას მიმართ ყველა სახის აღკვეთის ღონისძიება, მათ შორის ელექტრონული სამაჯურის ტარება ძალაში დატოვა, იუწყება ტელეკომპანია „იმედი“.  

დღეს მელიას საქმის პირველი წინასასამართლო განხილვა გაიმართა, სადაც მოსამართლემ არ დააკმაყოფილა ბრალდებულ მელიას ადვოკატის შუამდგომლობა, რომელიც დეპუტატისთვის აღკვეთის ღონისძიების გაუქმებას ან სხვა სახის ღონისძიების შეფარდებას ეხებოდა პირადი თავდებობის გამოყენებით. ნიკა მელიას ფრაქცია „ნაციონალური მოძრაობის" ექვსი დეპუტატი უდგებოდა თავდებში.

მოსამართლის თქმით, რისკები, რომლებიც მანამდე არსებობდა ბრალდებული დეპუტატის მიმართ, კვლავ შენარჩუნებულია, ამასთან, ნიკა მელიამ დღევანდელ პროცესზე წესრიგი დაარღვია – არ დაემორჩილა მოსამართლის მოწოდებას, რითიც მოსამართლე კიდევ მეტად დაარწმუნა იმაში, რომ მსგავს შემთხვევაში „პირადი თავდებები უძლურნი იქნებიან“.

აღსანიშნავია, რომ გადაწყვეტილების გამოტანის მომენტისთვის თავად ბრალდებული დეპუტატი ნიკა მელია დარბაზში არ იმყოფებოდა, ვინაიდან ის მანამდე გააძევა მოსამართლემ დაუმორჩილებლობისთვის.

თბილისის საქალაქო სასამართლომ 27 ივნისს ნიკა მელიას აღკვეთის ღონისძიების სახით 30 ათასი ლარის ოდენობით გირაო შეუფარდა. ბრალდებულს დაეკისრა დამატებითი ვალდებულებებიც, კერძოდ, ნიკანორ მელიას აეკრძალა: საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე; საზოგადოებრივი თავშეყრის ადგილზე საჯარო განცხადებების გაკეთება; მოწმეებთან ნებისმიერი სახის კომუნიკაცია; მასვე დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

მთავარი თემები