თბილისი, 30 სექტემბერი – Sputnik. ბორჯომის ხეობაში, სოფელ დაბაში, ხანძრით დაზიანებული ტყის მასივის გაწმენდითი სამუშაოები თითქმის დასრულებულია, იუწყება ეროვნული სატყეო სააგენტო.
ტერიტორიიდან გაიტანეს ხანძრით დაზიანებული ხეები, ჩატარდა პერიმეტრზე ღობის მთლიანობისა და ეროზიის საწინააღმდეგო, ნიადაგის აღდგენასთან დაკავშირებული ღონისძიებები.
„გაწმენდითი სამუშაოები სოფელ დაბაში, ნახანძრალ ტერიტორიაზე თითქმის დამთავრებულია, რის შემდეგაც დაიწყება დარგვის სამუშაოები. საყურადღებოა, რომ ძირითადად დასაქმებულია ადგილობრივი მოსახლეობა“, - განაცხადა ეროვნული სატყეო სააგენტოს უფროსმა თორნიკე გვაზავამ ტელეკომპანია „რუსთავი2“–ის ეთერში.
მისი თქმით, პირველ ეტაპზე აღდგენას 250 ჰექტარი ფართობი ექვემდებარება. მხოლოდ შემოდგომის სეზონზე დაირგვება 400 ათასამდე წიწვოვანი სახეობის ნერგი. სამუშაოები ოქტომბრის დასაწყისში დაიწყება.
ეროვნულ სატყეო სააგენტოში აღნიშნავენ, რომ პირვავნდელი ტყის ეკოსისტემის აღსადგენად მხოლოდ ადილობრივი, სტანდარტული ნერგები გამოიყენება, რომელთა გამოყვანა იმავე ზონაში მოწყობილ სატყეო სააგენტოს სანერგეებში ხდება.
ხანძრების სერია საქართველოს 2017 წლის ზაფხულში მოედო. ტყის ხანძრები განსაკუთრებით აგვისტოში გახშირდა. ყველაზე დიდი ხანძარი ბორჯომის ხეობაში, სოფელ დაბის ტყეში გაჩნდა. სპეციალისტების მონაცემებით, ხანგრძლივი ხანძრების შედეგად, ასობით ჰექტარი უნიკალური ტყე განადგურდა. ტყის ხანძრების დროს ვითარება მთიანმა რელიეფმა, ქარმა და კლიმატურმა პირობებმა გაართულა. საქართველოს ხანძრის ჩაქრობაში დახმარება აღმოუჩინეს თურქეთმა, სომხეთმა, აზერბაიჯანმა და ბელარუსმა.
