თბილისი, 2 აგვისტო — Sputnik. Emergency smart watch — მოწყობილობა, რომელიც 15 წლის ქართველმა დავით რიჟინაშვილმა გამოიგონა, ასაკოვან ადამიანებს შესაძლებლობას მისცემს, მუდმივად აკონტროლონ მათი ჯანმრთელობის მდგომარეობა.
„გონიერი საათი“ ასაკოვანმა ადამიანებმა ხელზე უნდა ატარონ. იმ შემთხვევაში, თუ მოხუცის ჯანმრთელობის მდგომარეობა გაუარესდება, Emergency smart watch ავტომატურად გზავნის მოკლე ტექსტურ შეტყობინებას მის ოჯახის წევრთან.
დავით რიჟინაშვილი დემირელის სახელობის კერძო კოლეჯის მე-10 კლასის მოსწავლეა. ახალბედა გამომგონებელი აცხადებს, რომ დაწერა სპეციალური პროგრამა, რომლის დახმარებითაც ნებისმიერი მსურველი შეძლებს მობილურ ტელეფონში აპლიკაციის ჩატვირთვას და შემდეგ wi-fi ინფორმაციის შეყვანას. ამის შემდეგ აპლიკაცია ID-ს მოგცემთ, რომლის საშუალებითაც გექნებათ დისტანციურად წვდომის საშუალება ოჯახის ასაკოვანი წევრის წნევისა და ტემპერატურის შესახებ ინფორმაციაზე.
„ასეთი საათის გამოგონების იდეა მოხუცებში გულის პრობლემების ხშირი შემთხვევების გამო დამებადა. ამ საათის მეშვეობით ნებისმიერს შეუძლია გააკონტროლოს მოხუცის ჯანმრთელობის მდგომარეობა და, აუცილებლობის შემთხვევაში, დროული დახმარებაც აღმოუჩინოს“, — ციტირებს სააგენტო „ნოვოსტი-გრუზია“ რიჟინაშვილის სიტყვებს.
ახალბედა გამომგონებელი „გონიერი საათის“ გაუმჯობესებას აპირებს იმ შემთხვევაში, თუ სტარტ-აპში წარმატებას მიაღწევს და თავისი პროდუქტის რეალიზებას დაიწყებს.
„ხშირად მსმენია, რომ როცა ოჯახის ყველა წევრი მუშაობს, მოხუცთან ვერავინ რჩება. ეს საათი იმიტომ შევქმენი, რომ მოხუცების ჯანმრთელობა ნებისმიერ დროს შეიძლება გაუარესდეს“, — განაცხადა რიჟინაშვილმა.
მისი სიტყვებით, ამ საათის შექმნისთვის მას სულ რაღაც ერთი კვირა დასჭირდა.
