საქართველოს დედაქალაქში ორშაბათიდან ფილმ „ფორსაჟი 9“-ის გადაღებები იწყება. დევნის, სროლისა და აფეთქებების სცენებს ვაჟა-ფშაველას გამზირზე გადაიღებენ. იხილეთ „Sputnik-საქართველოს“ ფოტოკადრები, როგორ მიიყვანეს ადგილზე ავტომობილები.
ვაჟა-ფშაველას გამზირის მნიშვნელოვანი ნაწილი გადაღებების გამო გადაკეტილია. ნაწილობრივ გადაკეტილია ტროტუარებიც, ხოლო უშუალოდ გადაღებების დროს მიმდებარე ტერიტორია სრულად დაიკეტება ქვეითებისთვისაც. ეს შეზღუდვები 27 აგვისტომდე იმოქმედებს.
სამედიცინო უნივერსიტეტის ეზოში განთავსებულია ფილმის გადასაღები აპარატურა და სხვა აღჭურვილობა. ფილმის გადასაღებად ტექნიკური საშუალებების მომზადება საგამოფენო ცენტრ Expo Georgia-ს ტერიტორიაზე მიმდინარეობს.
თავდაპირველად გავრცელდა ჭორები, რომ თბილისში ჩამოვიდოდნენ ფილმის მსახიობები, თუმცა ეს ინფორმაცია არ დადასტურდა. ფილმის მთავარი მსახიობები საქართველოში არ ჩამოდიან, მათ ნაცვლად კასკადიორები იმუშავებენ.
