თბილისი, 26 აპრილი – Sputnik. საქართველოს მთავრობა ქვეყნის მასშტაბური განახლების პროგრამას იწყებს, რომელიც 15 ათასამდე ახალი სამუშაო ადგილის შექმნასა და რეგიონების მოსახლეობის დასაქმებას ითვალისწინებს, განაცხადა საქართველოს პრემიერ-მინისტრმა ირაკლი ღარიბაშვილმა საქართველოს მთავრობის დღევანდელ სხდომაზე.
პრემიერის განმარტებით, პროგრამა 63 მუნიციპალიტეტში ურბანულ განახლებას, მნიშვნელოვანი კულტურულ-ისტორიული მემკვიდრეობის ობიექტების, მუნიციპალიტეტების ადმინისტრაციული ცენტრების რეაბილიტაციასა და რეკრეაციული სივრცეების მოწყობას გულისხმობს.
„ქვეყნის რეგიონების თანაბარი განვითარება, ხელშეწყობა ძალიან მნიშვნელოვანია. ჩვენი მოქალაქეებისთვის ადგილზე ცხოვრების, შრომისა და სრულად განვითარებების პირობების ყველგან გაუმჯობესება სახელმწიფოს მთავარი მიზანი უნდა გახდეს“, – განაცხადა ღარიბაშვილმა.
პრემიერის განმარტებით, რეგიონების განახლების პირველი ეტაპის ღირებულება 500 მლნ ლარს შეადგენს. პროგრამით გათვალისწინებულ პროექტებზე ტენდერები კი უკვე მიმდინარე კვირაში გამოცხადდება.
