თბილისი, 23 იანვარი — Sputnik. ქუთაისში მეტალურგიულ ქარხანა „ჰერკულესში" დასაქმებულების აქცია მიმდინარეობს, იუწყება საზოგადოებრივი მაუწყებლის პირველი არხი.
გახარია: დამსაქმებლებმა თავიანთი ვალდებულებები უნდა შეასრულონ>>
აქციის მონაწილეები ზეგანაკვეთური შრომის ანაზღაურებას ითხოვენ და რთულ სამუშაო პირობებს აპროტესტებენ.
„12 საათს გვამუშავებენ ძალიან რთულ პირობებში. ვითხოვთ გაგვაცნონ კონტრაქტი, რადგან არ ვიცით, რა წერია მასში", – განაცხადა აქციის მონაწილემ.
დასაქმებულების თქმით, საწარმოში არ არის ჩართული გამწოვი სისტემა და მუშებს არ ურიგებენ სპეცტანსაცმელს.
აქციას პარტია „თავისუფალი საქართველოს" თანათავმჯდომარე გოგი წულაიაც შეუერთდა.
საწარმოს ადმინისტრაციას მასმედიასთან კომენტარი ამ დრომდე არ გაუკეთებია. საწარმოს მფლობელები ინდოელი ინვესტორები არიან.
მეტალურგიული ქარხანა „ჰერკულესი" ქუთაისში ინდურმა კომპანია Eurasian Steels-მა ააშენა. ქარხანამ მუშაობა 2008 წელს დაიწყო.