თბილისი, 31 დეკემბერი – Sputnik. ქართველი რეჟისორის დიმიტრი ცინცაძის ფილმი „შინდისი“ ამერიკის პრესტიჟული და მასშტაბური საერთაშორისო კინოფესტივალის „სანტა ბარბარას“ საკონკურსო ფილმებს შორის მოხვდა, იუწყება საზოგადოებრივი მაუწყებლის პირველი არხი.
კონკურსი 2020 წლის 15 იანვრიდან 25 იანვრის ჩათვლით გაიმართება.
წელს კინოფესტივალის ჟიურის წევრები და საპატიო სტუმრები იქნებიან მარტინ სკორსეზე, ბრედ პიტი, ლაურა დერნი და რენე ზელვეგერი, რომლებსაც სპეციალურ ჯილდოსაც გადასცემენ კინოს განვითარებაში შეტანილი განსაკუთრებული წვლილისთვის.
გარდა აღნიშნული კონკურსისა, „შინდისი“ 2020 წელს ნაჩვენები იქნება ესპანეთის, იტალიის, ბელგიის, ჰოლანდიისა და ჩინეთის კინოფესტივალებზე.
ფილმი „შინდისი" მოგვითხრობს სოფლის ისტორიას, რომელმაც 2008 წლის აგვისტოს ომი გადაიტანა. ფილმი ეფუძნება რეალურ ისტორიას და დაღუპული გმირების ხსოვნას ეძღვნება.
ფილმის რეჟისორს უკვე მიღებული აქვს პრიზი ვარშავის საერთაშორისო კინოფესტივალზე „საუკეთესო რეჟისორის" ნომინაციაში, ხოლო თავად ფილმმა ამავე ფესტივალზე გრან-პრი დაიმსახურა „საერთაშორისო კონკურსის" კატეგორიაში.
დიმიტრი ცინცაძეს ფილმისთვის „შინდისი“ ჰოლივუდში „ოსკარისა“ და „ოქროს გლობუსის“ კამპანიის ფარგლებში გამართულ აზიური ფილმების მსოფლიო ფესტივალზე საუკეთესო რეჟისორის ჯილდოც გადასცეს.
