თბილისი, 6 ივნისი - Sputnik. ახალგაზრდა ქართველი ფოტოგრაფების ფირის ფოტოების გამოფენა ვაკის პარკში 8 და 9 ივნისს გაიმართება.
ღონისძიების ორგანიზატორებს სურთ დამთვალიერებელს აჩვენონ, რომ საქართველოში ჯერ კიდევ ცოცხლობს ფირის ფოტოგრაფია. გამოფენა ვაკის პარკის მედიათეკაში 8 ივნისს 17:00 საათიდან 00:00 საათამდე და 9 ივნისს 11:00-დან 20:00 საათამდე ჩატარდება.
„დღეს, ციფრულ ეპოქაში მივიწყებულია ფირის ფოტო და ზოგიერთისთვის ის მხოლოდ წარსულთან ასოცირდება“, – ამბობენ ორგანიზატორები, თუმცა ამის მიუხედავად, დარჩა ადამიანთა ჯგუფი, რომელიც უპირატესობას ფოტოფირს ანიჭებს.
გამოფენაში მონაწილეობას მიიღებს 19 ფოტოგრაფი, მათ შორის იქნებიან ხატია გელაშვილი, თინათინ ცხვედაძე, ლევან კაკიაშვილი და სხვები.
გამოფენაზე შესვლა თავისუფალია.