თბილისი, 23 აგვისტო – Sputnik. 1980 წლამდე დაბადებულ საქართველოს მოქალაქეებს, რომლებიც ყვავილზე სავალდებულო წესით აცრეს, იმუნიტეტი წლების განმავლობაში შეუმცირდათ და რთული სათქმელია, რამდენად ეფექტური იქნება დღეს, განაცხადა პრეს-კონფერენციაზე იაშვილის სახელობის ბავშვთა ცენტრალური საავადმყოფოს სამედიცინო დირექტორმა ივანე ჩხაიძემ.
ბოლო დღეებში სულ უფრო მეტი ქვეყანა მაიმუნის ყვავილის ახალი შტამით (mpox) ინფიცირების შემთხვევების ზრდაზე საუბრობს. ინფექცია ჯანდაცვის მსოფლიო ორგანიზაციამ (WHO) წელს გამოავლინა. დაავადება სწრაფად ვრცელდება არა მხოლოდ აფრიკის ქვეყნებში, სადაც ის უფრო ხშირია, არამედ აფრიკის კონტინენტის ფარგლებს გარეთაც - შვედეთში, პაკისტანსა და ავსტრალიაში.
„1980 წლამდე დაბადებულს, ვისაც აქვს ყვავილზე ვაქცინა გაკეთებული, მათ დაავადების საწინააღმდეგო აქტიური იმუნიტეტი ჰქონდათ. მაგრამ დროთა განმავლობაში ეს იმუნიტეტი შემცირდა, ამ ვაქცინის დამცველობითი უნარი შემცირდა. 2022-2023 წლის აფეთქება გარკვეულწილად უკავშირდება ამ იმუნიტეტის შემცირებას და გაქრობას. საქართველოში რთული სათქმელია არის თუ არა მოსახლეობის ფენაში დარჩენილი იმუნიტეტი“, - განაცხადა ივანე ჩხაიძემ.
მისი თქმით, დღეისთვის არსებობს ოთხი ტიპის ვაქცინა, რომელიც ეფექტურია როგორც პრევენციისთვის, ისე ინფიცირების შემდგომაც.
„რაც შეეხება ვაქცინას, 4 ტიპის ვაქცინაა მსოფლიოში. მიიჩნევა, რომ ეს ვაქცინა ეფექტურია როგორც დაავადების თავიდან აცილების, ასევე ინფიცირების შემთხვევაში. თუ თქვენ კონტაქტი გქონდათ ადამიანთან, რომელსაც „მაიმუნის ყვავილი“ დაუდასტურდა, ამ ვაქცინის გაკეთება სწრაფად, დაავადებისგან თავის დაცვის შესაძლებლობად მიიჩნევა“, - განაცხადა ჩხაიძემ.
მისი თქმით, მკურნალობა არის სიმპტომური, მაგრამ არსებობს ანტივირუსული საშუალებაც, მისი საბოლოო ეფექტურობა კვლევებით დადასტურებული არაა, მაგრამ გამოიყენება წარმატებით და ამცირებს ლეტალურ შედეგს.
ყველაფერი იწყება ვირუსული ინფექციით, ციებით, საერთო სისუსტით, რესპირატორული სიმპტომებით, შემდეგ იწყება სპეციფიური გამონაყარი, ბუშტუკების შიგნით არის სითხე, მალე ეს ბუშტუკები სკდება. საშუალოდ მაიმუნის ყვავილი ორიდან ოთხ კვირამდე გრძელდება.
მაიმუნის ყვავილი ადამიანებში პირველად 1970 წელს კონგოს დემოკრატიულ რესპუბლიკაში გამოვლინდა.
2022 წლის ივლისში მაიმუნის ყვავილის აფეთქების გამო საერთაშორისო მნიშვნელობის მქონე საგანგებო მდგომარეობა გამოცხადდა, რადგან ის სწრაფად გავრცელდა სქესობრივი გზით იმ ქვეყნებში, სადაც ვირუსი მანამდე არ ფიქსირდებოდა.
2023 წლის მაისში მას შემდეგ რაც დაავადების შემთხვევების მდგრადი შემცირება დაფიქსირდა, საგანგებო სიტუაცია მოიხსნა. მაგრამ ამის შემდეგ შემთხვევების რაოდენობა მნიშვნელოვნად გაიზარდა.
უკვე 2024 წელს შემთხვევების რაოდენობა გაცდა გასული წლის მაჩვენებლებს - 15,6 ათასზე მეტი შემთხვევა და 537 გარდაცვალება, ნათქვამია ჯანმოს განცხადებაში.
ჯანმოს 12 აგვისტოს ანგარიშის მიხედვით, 2022 წლის იანვრიდან 2024 წლის ივნისამდე პერიოდში დაფიქსირდა მაიმუნის ყვავილის 99.176 ინფიცირების შემთხვევა და 208 გარდაცვალება (აქედან 141 აფრიკაში).
მაიმუნის ყვავილი არის ვირუსული ინფექცია, რომელიც შეიძლება გადაეცეს ადამიანიდან ადამიანზე, ხოლო ზოგიერთ შემთხვევაში, ინფიცირება შეიძლება მოხდეს გარემოს საგნებისა და ზედაპირების მეშვეობით, რომლებსაც ინფიცირებული ადამიანი შეეხო.
ტიპიური სიმპტომებია გამონაყარი კანზე ან ლორწოვანი გარსების დაზიანება, რომელიც შეიძლება გაგრძელდეს ორიდან ოთხ კვირამდე და ამას თან ახლავს ცხელება, თავის ტკივილი, კუნთებისა და ზურგის ტკივილი, სისუსტე და ლიმფური კვანძების გადიდება.