თბილისი, 8 მარტი – Sputnik. საქართველოს პრემიერ-მინისტრი ირაკლი კობახიძე ჯანდაცვის ახალ მინისტრს ორშაბათს, 10 მარტს წარადგენს, - ამის შესახებ მმართველი პარტია „ქართული ოცნება - დემოკრატიული საქართველოს“ ერთ-ერთმა ლიდერმა მამუკა მდინარაძემ განაცხადა.
უწყების ძველმა ხელმძღვანელმა ზურაბ აზარაშვილმა ოკუპირებული ტერიტორიებიდან იძულებით გადაადგილებულ პირთა, შრომის, ჯანმრთელობისა და სოციალური დაცვის მინისტრის პოსტი 1 მარტს დატოვა.
„პრემიერ-მინისტრს ჯანდაცვის მინისტრთან დაკავშირებით გადაწყვეტილება მიღებული აქვს, რის თაობაზეც მე არ და ვერ ვისაუბრებ, რადგან ეს მთავრობის ხელმძღვანელის პრეროგატივაა. ბევრ ადამიანთან ჰქონდა კონსულტაცია პარტიულად, ჩვენთანაც. არჩევანი გაკეთდა რამდენიმე ძალიან ღირსეულ ადამიანს შორის და გადაწყვეტილება მიიღო. როგორც ვიცი, ორშაბათს, მთავრობის სხდომაზე გამოაცხადებს გადაწყვეტილებას“, – განაცხადა მამუკა მდინარაძემ.
აზარაშვილის მინისტრობის დროს დაინერგა DRG-სისტემა. სამედიცინო სერვისების გაუმჯობესების მიზნით ჯანდაცვის სამინისტრომ 2022 წლის 1 ნოემბრიდან დანერგა კლინიკების დაფინანსების ახალი სისტემა, რომლის მიხედვითაც გამოითვლება მკურნალობის ხარჯების საბაზისო ტარიფები. საუბარია საერთაშორისო სისტემაზე Diagnostic Related Group.
მაგრამ რესპუბლიკური საავადმყოფოს რეორგანიზაციის პროექტი სრული ჩავარდნა იყო, რაც მმართველ პარტიაშიც დაადასტურეს. რესპუბლიკურის რეორგანიზაციასა და დემონტაჟზე უარის თქმა იყო ერთ-ერთი პირველი გადაწყვეტილება ირაკლი კობახიძისთვის მას შემდეგ, რაც მან პრემიერ-მინისტრის პოსტის დაიკავა.