თბილისი, 21 დეკემბერი — Sputnik. 2024 წლიდან საყოველთაო ჯანდაცვის სახელმწიფო პროგრამას კიბოს ადრეული დიაგნოსტიკის პროგრამა დაემატება, განაცხადა ჯანდაცვის მინისტრმა ზურაბ აზარაშვილმა.
მისი თქმით, კიბოს ადრეული დიაგნოსტიკა, გაცილებით ეფექტურია ფინანსური კუთხითაც და ამას მსოფლიოს სხვადასხვა ქვეყნის გამოცდილებაც ადასტურებს, სადაც ადრეული დიაგნოსტიკის შემთხვევაში, დანახარჯები დაახლოებით, 40%-ით მცირდება.
„როგორც კი ეჭვი გაჩნდება რაიმე ტიპის სიმსივნეზე, კონკრეტულ კლინიკებში საბოლოო დიაგნოზის დასმას და ამ პროცესის დაფინანსებას უზრუნველვყოთ. ეს საშუალებას მოგვცემს, რაც შეიძლება ადრეულ ეტაპზე აღმოვაჩინოთ ონკოლოგიური დაავადება. ასეთ დროს, განკურნების შანსი უფრო მაღალია", – აღნიშნა აზარაშვილმა.
2023 წლის აგვისტოდან საქართველოში ჰორმონოთერაპია, ქიმიოთერაპია, სხივური თერაპია და მედიკამენტები ყველა ონკოლოგიურ პაციენტს უფინანსდება. გარდა ამისა, ონკოლოგიური ქირურგიის გეგმური და გადაუდებელი ოპერაციები დაუფინანსდება ყველა ონკოპაციენტს, მათ შორის დაზღვეულ ვეტერანებსა და პაციენტებს, რომელთა წლიური შემოსავალი 40.000 ლარზე მეტია.
მინისტრის განმარტებით, ონკოლოგიური დაავადებების მკურნალობა საყოველთაო ჯანდაცვის პროგრამის ფარგლებში თითოეული ბენეფიციარისთვის თანაბრად ხელმისაწვდომი იქნება – მათი შემოსავლის მიუხედავად.
ზურაბ აზარაშვილმა საყოველთაო ჯანმრთელობის დაცვის პროგრამის წარმატებაზეც ისაუბრა. მისი თქმით, 2013 წელს მიღებული გადაწყვეტილება იყო განაცხადი, რომ სამედიცინო სერვისების თუ მედიკამენტების ხარჯების მაქსიმალურად დაფინანსებით სახელმწიფო ზრუნავს საკუთარ მოქალაქეებზე, ზუსტად ისე, როგორც ეს მსოფლიოს წამყვან ქვეყნებშია.
საქართველოში საყოველთაო ჯანდაცვის პროგრამა 2013 წლიდან მოქმედებს. დაწესებულია შეღავათები მედიკამენტების შეძენისას სოციალურად დაუცველი პირების, პენსიონერებისა და შეზღუდული შესაძლებლობების მქონე პირებისთვის.
გადაუდებელი სამედიცინო მომსახურება ამჟამად ხელმისაწვდომია საქართველოს მოსახლეობის 90%-სთვის. გარდა ამისა, საყოველთაო ჯანდაცვის პროგრამის წყალობით მოქალაქეების ხარჯები 25%-ით შემცირდა.
საყოველთაო ჯანდაცვის პროგრამა მოიცავს ექვს ჯგუფს: სამიზნე ჯგუფებს (5 წლამდე ბავშვები, სტუდენტები, პენსიონერები, მასწავლებლები, შშმ და სოციალურად დაუცველი პირები), მაღალი შემოსავლის მქონე მოქალაქეებს, საშუალო შემოსავლის მქონე მოქალაქეებს, 70 ათასიდან 100 ათასამდე სარეიტინგო ქულის მქონე სოციალურად დაუცველ მოქალაქეებს, 6-დან 18 წლამდე მოზარდებს და დაბალი, არარეგულარული შემოსავლის მქონე მოქალაქეებს.