თბილისი, 29 ნოემბერი – Sputnik. ბოლო წლებში საქართველოში 271 სკოლაში სამშენებლო-სარემონტო სამუშაოები ჩატარდა, - ამის შესახებ განათლებისა და მეცნიერების მინისტრმა გიორგი ამილახვარმა პარლამენტში „მინისტრის საათის“ ფორმატში გამოსვლისას განაცხადა.
2022-2023 წლებში განხორციელდა ჯამში 71 საჯარო სკოლის მშენებლობა/სრული რეაბილიტაციის სამუშაოები, ხოლო 200 საჯარო სკოლაში ნაწილობრივი სარეაბილიტაციო სამუშაოები ჩატარდა.
დღეისათვის უკვე მიმდინარეობს 150 საჯარო სკოლის მშენებლობა-რეაბილიტაციის სამუშაოები. 2024 წლის დასაწყისში დაგეგმილია კიდევ 75 საჯარო სკოლის მშენებლობის სამუშაოების დაწყება. ჯამში ამ მიმართულებით 700 მილიონი ლარი დაიხარჯება.
გიორგი ამილახვარის განცხადებით, საქართველოს მთავრობის უმთავრეს პრიორიტეტს მთელი ქვეყნის მასშტაბით საგანმანათლებლო ინფრასტრუქტურის განვითარების ხელშეწყობა წარმოადგენს.
„აღსანიშნავია, რომ პროექტის, განხორციელების შედეგად, 2027 წლის ბოლოსთვის ყველა საჯარო ზოგადსაგანმანათლებლო დაწესებულება ინფრასტრუქტურულად გამართული იქნება“, - აღნიშნა გიორგი ამილახვარმა.
მისი თქმით, 2023 წლისთვის დასრულდა 4 ახალი პროფესიული კოლეჯის და 3 ახალი სახელოსნოს მშენებლობა. სრული რეაბილიტაცია კი ჩაუტარდა 2 პროფესიულ კოლეჯს.
როგორც გიორგი ამილახვარმა აღნიშნა, ამ ეტაპზე მიმდინარეობს 4 ახალი პროფესიული კოლეჯის და 4 ახალი სახელოსნოს მშენებლობა. პროფესიული სასწავლებლების ინფრასტრუქტურის გაუმჯობესების მიმართულებით 2022-2023 წლის ჯამურმა ბიუჯეტმა შეადგინა 36 მილიონ ლარზე მეტი.
საქართველოში 2022 წლის შემოდგომიდან პრემიერ-მინისტრ ირაკლი ღარიბაშვილის ინიციატივით მასშტაბური პროექტის - 800 სკოლის მშენებლობა და განახლება დაიწყო.
პროექტის განხორციელების შედეგად უფრო ხელმისაწვდომი გახდება საგანმანათლებლო რესურსები, რომლებსაც 230 ათასზე მეტი სტუდენტი გამოიყენებს.
პროექტის ღირებულება ერთი მილიარდი ლარია.