საქართველოსა და რუმინეთის პარლამენტებმა თანამშრომლობის შესახებ დეკლარაციას მოაწერეს ხელი

„დეკლარაციით გათვალისწინებულია საპარლამენტო თანამშრომლობის გაღრმავება არაერთი მიმართულებით, მათ შორის, რეგულარული ორმხრივი ვიზიტების განხორციელება, მეგობრობის ჯგუფებსა და სექტორულ კომიტეტებს შორის კავშირების გააქტიურება, პარლამენტების თანამშრომლებისთვის პროფესიული განვითარების პროგრამების შეთავაზება და სხვა“, – ნათქვამია განცხადებაში.

„შავი ზღვის წყალქვეშა ელექტროგადამცემი კაბელის ფლაგმანი პროექტი კარგი მაგალითია, რომელსაც უზარმაზარი პოტენციალი აქვს, რომ დაეხმაროს ევროპას, მათ შორის რუმინეთს, ენერგორესურსების დივერსიფიკაციასა და მწვანე ენერგიაზე გადასვლის ხელშეწყობაში“, – განაცხადა პაპუაშვილმა.

„მწვანე ენერგეტიკული დერეფანი“ და შავი ზღვის წყალქვეშა ელექტროკაბელი მხოლოდ ორი მაგალითია ამგვარი თანამშრომლობის. ვაფასებ ღია და გულწრფელ დიალოგს საქართველოს პარლამენტის თავმჯდომარესთან. მინდა კიდევ ერთხელ გადავუხადო მას მადლობა ამ ვიზიტისთვის, რომელიც, ჩემი აზრით, კიდევ ერთი ნაბიჯია ჩვენ ქვეყნებს შორის დიალოგის გაუმჯობესებისკენ“, – განაცხადა ჩუკამ.

„ჩემი ქვეყანა ევროკავშირის წევრ ქვეყნებს შორის პირველი იყო, რომელმაც ევროკავშირსა და საქართველოს შორის ასოცირების ხელშეკრულების რატიფიცირება მოახდინა 2014 წლის 3 ივლისს. რუმინეთი თანამიმდევრულად უჭერს მხარს საქართველოს ნაბიჯებს, მათ შორის რეფორმებს, რომლებიც ევროკავშირისკენ არის მიმართული“, – განაცხადა ჩუკამ.

„მადლიერები ვართ სენატში ჩვენი გულთბილი მიღებისთვის. ვაფასებთ რუმინეთის მხრიდან საქართველოს მხარდამჭერ თითოეულ ნაბიჯსა და განცხადებას. დაე, იყოს ჩვენი საერთო წინაპრის – ანთიმოზ ივერიელის მემკვიდრეობა ჩვენი მეგზური მშვიდობასა და კეთილდღეობაზე ორიენტირებული ერთობლივი მომავლის გზაზე“, – განაცხადა პაპუაშვილმა.