თბილისი, 27 ივლისი — Sputnik. მმართველი პარტია „ქართული ოცნება" და ოპოზიციური პარტია „ერთიანი ნაციონალური მოძრაობა" ყველაზე დიდი მოკავშირეები არიან და ხალხს საკუთარ ტყვეობაში ამყოფებენ, განაცხადა ოპოზიციური პარტია "გირჩის" ერთ-ერთმა ლიდერმა იაგო ხვიჩიამ.
ასე გამოეხმაურა ხვიჩია ოპოზიციური პარტიის „საქართველოსთვის" ლიდერის, ექს-პრემიერ გიორგი გახარიას განცხადებას იმის თაობაზე, რომ „ქართულმა ოცნებამ" და „ნაცმოძრაობამ" მომავალ საპარლამენტო არჩევნებში ერთად 50% ვერ უნდა გადალახონ. გახარიამ ამ პარტიებს ქვეყნისთვის დამანგრეველი და საშიში ძალა უწოდა, რომლებიც ერთმანეთთან თანამშრომლობენ და ერთად შოულობენ ფულს.
„არ ვიცი გახარია ამ დასკვნამდე როგორ მივიდა, მაგრამ ამ ფორმულირებას ვეთანხმები, რადგანაც „ქართულ ოცნებას" და „ნაცმოძრაობას" ერთ ძალად ვთვლი. საბოლოო ჯამში ისინი მარტივად შექმნიან ერთმანეთთან კოალიციას. ისინი ერთმანეთის ყველაზე დიდი მოკავშირეები არიან... სინამდვილეში ქართველი ხალხი ამ ორი პარტიის ტყვეობაშია", – განაცხადა ხვიჩიამ.
პოლიტიკოსის თქმით, „ნაციონალურ მოძრაობას" და „ქართულ ოცნებას" ბევრი საერთო აქვთ.
„ნაცმოძრაობას" და „ქართულ ოცნებას" ერთმანეთთან ყველაზე მეტი საერთო აქვთ, უბრალოდ ამ საერთოს მალავენ ერთმანეთთან ჩხუბით, გინებით, შეურაცხყოფით, იმისათვის, რომ ადამიანებმა არც კი დაუშვან იმაზე ფიქრი, თუ როგორ ვერ შეიძლება, რომ მათ 50%-ზე მეტი არ აიღონ", – განაცხადა ხვიჩიამ ტელეარხზე PalitraNews.
იმისათვის რომ „ქართულმა ოცნებამ" და „ნაციონალურმა მოძრაობამ" ერთად 50% ვერ აიღონ, საჭიროა ადამიანებმა ალტერნატიული იდეა დაინახონ, აღნიშნა ხვიჩიამ.
„ჩვენ გვაქვს ეს იდეა. ამას პარტიები ვერ შეძლებენ, ეს უნდა შეძლოს იდეამ. ახლა მაინც დაინახოს ხალხმა, რომ „ქართული ოცნება" და „ნაცმოძრაობა" საბოლოო ჯამში ერთი ძალაა და სწორედ ამიტომ მათ ვერ უნდა გადალახონ 50%-იანი ბარიერი", – განაცხადა პოლიტიკოსმა.
საქართველოში საპარლამენტო არჩევნები 2024 წლის ოქტომბერში ჩატარდება მთლიანად პროპორციული სისტემით და მაღალი, 5%-იანი გამსვლელი ბარიერის პირობებში. უმრავლესობის მოსაპოვებლად და მთავრობის ერთპიროვნულად ფორმირებისთვის პარტიამ არჩევნებზე მისულ ამომრჩეველთა ხმების ნახევარზე მეტი უნდა მოიპოვოს.
საზოგადოებრივი აზრის კვლევების თანახმად, ბარიერის გადალახვის შანსი დღეს „ქართულ ოცნებას" და მთავარ ოპოზიციურ პარტია „ნაციონალურ მოძრაობას" აქვთ.
ყველა შემთხვევაში „ნაცმოძრაობასა" და „ქართულ ოცნებას" შორის მნიშვნელოვანი სხვაობაა „ქართული ოცნების" სასარგებლოდ, მაგრამ ჯერჯერობით მხოლოდ ერთი კვლევა მიუთითებს, რომ დღევანდელი მმართველი პარტია ამჯერადაც შეძლებს საპარლამენტო უმრავლესობის მოპოვებას.
გასულ კვირაში ოპოზიციური პარტიის „სამართლიანობისთვის" ლიდერმა ეკა ბესელიამ განაცხადა, რომ გახარიას შეუძლია 2024 წლის საპარლამენტო არჩევნებისთვის თავის გარშემო ძალზე საინტერესო კონფიგურაცია შექმნას. პოლიტიკოსის აზრით, უნდა გაჩნდეს „ქართული ოცნებისა" და „ნაციონალური მოძრაობის" ალტერნატივა.
ამასთან, გახარიას პარტიამ სოციალურ ქსელში გაავრცელა პოსტი, რომელშიც ნათქვამია, რომ საპარლამენტო არჩევნებისთვის ისინი არცერთ პარტიასთან არ აპირებენ გაერთიანებას.
გიორგი გახარიამ, რომელმაც „ქართული ოცნების" რიგები და პრემიერის პოსტი დატოვა, 2021 წლის მაისში პარტია „საქართველოსთვის" დააფუძნა. პარტიისთვის პირველივე, ადგილობრივ არჩევნებში მან მესამე შედეგი აჩვენა და ქვეყნის თითქმის ყველა საკრებულოში მიიღო ადგილი.