თბილისი, 12 ივლისი — Sputnik. საქართველოს თავდაცვის სამინისტრომ ცნობილ გერმანულ საპროთეზო კომპანია Ottobock SE & Co. KgaA-სთან ხელშეკრულება გააფორმა, რომელიც საქართველოს თავდაცვის ძალების დაჭრილ-დაშავებული სამხედრო მოსამსახურეებისთვის უმაღლესი ხარისხის პროთეზების მიწოდებას ითვალისწინებს, ნათქვამია სამინისტროს მიერ გავრცელებულ ინფორმაციაში.
ხელშეკრულების თანახმად, თავდაცვის უწყება დაჭრილი სამხედრო მოსამსახურეებისთვის 28 ერთეულ ქვედა კიდურისა და 7 ერთეულ ზედა კიდურის პროთეზს შეისყიდის. პროთეზების მიწოდება და შესაბამისი მომსახურება ეტაპობრივად განხორციელდება. საგარანტიო პერიოდში კომპანია ეტაპობრივად უზრუნველყოფს პროთეზების გეგმურ სერვისულ შემოწმებასა და შეკეთებას.
დოკუმენტს ხელი წეროვანში, მარიამ (მარო) მაყაშვილის სახელობის სამხედრო მოსამსახურეების სარეაბილიტაციო ცენტრში თავდაცვის მინისტრის მოადგილემ გიორგი ხაინდრავამ და Ottobock SE & Co. KgaA-ს წარმომადგენელმა დენის ვოლტერმა მოაწერეს.
დოკუმენტის ხელმოწერამდე წეროვანში თავდაცვის მინისტრის მოადგილეებმა გიორგი ხაინდრავამ და გიორგი ბუბუნაურმა და სოციალურ საკითხთა და ფსიქოლოგიური მხარდაჭერის დეპარტამენტის უფროსმა კარლო ლაბაძემ ცნობილ გერმანულ საპროთეზო კომპანიის Ottobock SE & Co. KgaA-ს წარმომადგენლებთან სამუშაო შეხვედრა გამართეს.
მხარეებმა დაჭრილ-დაშავებული სამხედრო მოსამსახურეების საჭიროებებსა და მათთვის საპროთეზო-ორთოპედიული საშუალებების მიწოდების ხარისხიანი მომსახურების უზრუნველყოფის მნიშვნელობაზე ისაუბრეს.
საქართველოს თავდაცვის უწყების წარმომადგენლებმა ხაზგასმით აღნიშნეს, რომ თავდაცვის სამინისტროსთვის დაჭრილ-დაშავებულ სამხედრო მოსამსახურეებსა და მათი ოჯახის წევრებზე ზრუნვა პრიორიტეტულია, ნათქვამია გავრცელებულ ინფორმაციაში.