თბილისი, 1 ივნისი – Sputnik. სურსათის ეროვნული სააგენტოს უფროსის მოადგილე ვასილ ბასილაძე ცხოველთა ჯანდაცვის მსოფლიო ორგანიზაციის (OIE) ევროპის რეგიონული კომისიის ბიუროს ვიცე-პრეზიდენტად აირჩიეს, ნათქვამია უწყების მიერ გავრცელებულ განცხადებაში.
ცხოველთა ჯანდაცვის მსოფლიო ორგანიზაციის (WOAH) ასამბლეის 90-ე გენერალური სესია მიმდინარე წელსაც, ტრადიციულად, პარიზში გაიმართა. ორგანიზაციის წევრი 183 ქვეყნის წარმომადგენლებმა, ექსპერტებმა და პარტნიორებმა, ხუთდღიანი სესიის ფარგლებში, ცხოველთა ჯანმრთელობის საკითხებსა და არსებული გამოწვევების გადაჭრის გზებზე იმსჯელეს.
სესიის ფარგლებში ბასილაძე ახალ თანამდებობაზე აირჩიეს. 2021 წლიდან ის ევროპული რეგიონული კომისიის გენერალური მდივნის პოზიციას იკავებდა.
სესიაზე კიდევ ერთხელ გაესვა ხაზი საქართველოს როლს რეგიონში ცხოველებში ინფექციური დაავადებების ფართო გავრცელების წინააღმდეგ ბრძოლაში.
ვასილ ბასილაძემ დელეგატებს მადლობა გადაუხადა და აღნიშნა, რომ საქართველო კვლავ აქტიურად იქნება ჩართული ორგანიზაციის დღის წესრიგით დადგენილ რეფორმებში და განახორციელებს ყველა იმ ღონისძიებებს, რომლებიც ხელს შეუწყობს რეგიონში ცხოველთა დაავადებების პრევენციას და კონტროლს.
OIE წამყვან როლს ასრულებს და განსაზღვრავს ვეტერინარულ პოლიტიკას მსოფლიოში და ზედამხედველობას უწევს მისი იმპლემენტაციის პროცესს. WOAH-ის საერთაშორისო სტანდარტებით რეგულირდება ცხოველთა 120-ზე მეტი დაავადება, მათ შორის ზოონოზები - ადამიანის და ცხოველის საერთო დაავადებები.
ეს არის წამყვანი საერთაშორისო ორგანიზაცია, რომელიც პასუხისმგებელია ცხოველთა ჯანმრთელობის გაუმჯობესებაზე მთელ მსოფლიოში. მისი საქმიანობა მოიცავს ცხოველთა დაავადებების კოორდინაციას, მხარდაჭერას და ბრძოლას ცხოველთა დაავადებების წინააღმდეგ, სურსათის უვნებლობას და ცხოველთა კეთილდღეობას.