თბილისი, 25 აპრილი – Sputnik. თბილისის დიდუბის რაიონში, ცაბაძის ქუჩაზე 25 აპრილის 23:00 საათიდან სამი დღით ტრანსპორტის მოძრაობა შეიზღუდება, რაც წერეთლის გამზირზე მასშტაბურ სარემონტო სამუშაოებს უკავშირდება, იუწყება თბილისის მერია.
წერეთლის გამზირზე სარემონტო სამუშაოები 17 აპრილს დაიწყო და 2024 წლის იანვრამდე გაგრძელდება. გამზირის აღდგენისა და განახლებისთვის დედაქალაქის ბიუჯეტიდან 32 მლნ ლარია გამოყოფილი.
მერიის ინფორმაციით, სამი დღის განმავლობაში ტრანსპორტი ცაბაძის ქუჩაზე ცალმხრივად იმოძრავებს.
კერძოდ, მოძრაობა „დინამოს“ სტადიონის მიმდებარე ტერიტორიიდან მარცხენა სანაპიროს მიმართულებით შესაძლებელი იქნება დიმიტრი ყიფიანის ქუჩისა და დავით აღმაშენებლის გამზირის კვეთის მეშვეობით, ხოლო მოძრაობა მარცხენა სანაპიროდან „დინამო არენის“ მიმართულებით დროებით შეიზღუდება.
თბილისის მერია მოსახლეობასა და დედაქალაქის სტუმრებს დისკომფორტის გამო ბოდიშს უხდის.
თბილისის მერიამ წერეთლის გამზირის რემონტთან დაკავშირებით 19 აპრილის 23:00 საათიდან ტრანსპორტის მოძრაობის ჩვეულ სქემაში ცვლილებები შეიტანა.
კერძოდ, ტრანსპორტის მოძრაობა გზის სავალი ნაწილის ორივე მხარეს მონაცვლეობით შეიზღუდება აკაკი წერეთლის გამზირზე, გიორგი ცაბაძის ქუჩიდან შოთა შალიკაშვილის სახელობის ხიდის ჩათვლით.
რეაბილიტაციის პერიოდში ავტომობილებისა და საზოგადოებრივი ტრანსპორტის გადაადგილებისთვის წერეთლის გამზირზე მოძრაობა დარჩება ორმხრივი, თუმცა თითოეული მიმართულებისთვის გამოყოფილი იქნება მხოლოდ თითო სამოძრაო ზოლი.
წერეთლის გამზირის რეაბილიტაციასთან ერთად იგეგმება 152 მეტრი სიგრძის ე.წ. დიდუბის (შალიკაშვილის სახელობის) ხიდის სრული განახლება, რომელიც 1953 წელს აშენდა და მას შემდეგ სარემონტო სამუშაოები არ ჩატარებია.