თბილისი, 21 მარტი — Sputnik. აჭარის ტურიზმის დეპარტამენტი აგრძელებს რეგიონის ტურისტული პროდუქტების პოპულარიზაციას საერთაშორისო ტურისტულ გამოფენებზე, ნათქვამია უწყების მიერ გავრცელებულ განცხადებაში.
წელს აჭარის ტურიზმის დეპარტამენტმა რეგიონი ჯამში 16 საერთაშორისო ტურისტულ გამოფენაზე წარადგინა, მათ შორის ბერლინის, მადრიდის, მილანისა და ისრაელის ტურისტულ გამოფენებზე.
ბოლო პერიოდში აჭარის ტურისტულ შესაძლებლობებს ვენისა და პრაღის ტურისტული გამოფენის ვიზიტორები გაეცნენ.
„აჭარის ტურიზმის დეპარტამენტმა რეგიონს პოპულარიზაცია ავსტრიასა და ჩეხეთში წელს პირველად გაუწია. გამოფენების ფარგლებში შეხვედრები გაიმართა ტურისტული ასოციაციების, სააგენტოების, სარეკლამო კომპანიებისა და მასმედიის წარმომადგენლებთან, მათ შორის, ჩეხეთის ტურიზმის სააგენტოსა და ჩეხეთის ტუროპერატორებისა და ტურისტული აგენტების ასოციაციის ხელმძღვანელებთან", – აღნიშნულია განცხადებაში.
უწყების ცნობით, გამოფენაზე აჭარა დამოუკიდებელი სტენდით იყო წარმოდგენილი. პრაღის გამოფენაზე HOLIDAY WORLD & REGION WORLD 2023 აჭარის სტენდმა ყველაზე შთამბეჭდავი ექსპოზიციის ტიტული მიიღო.
ტურიზმის დეპარტამენტის ინფორმაციით, გამოფენებზე აჭარის და, ზოგადად, საქართველოს, როგორც ახალი ტურისტული მიმართულების მიმართ დაინტერესება მაღალი იყო.