თბილისი, 20 იანვარი — Sputnik. საგარეჯოში სროლის შედეგად ხუთი ადამიანია დაჭრილი, აქედან ერთის მდგომარეობა მძიმეა, განაცხადა საგარეჯოს საავადმყოფოს ექიმმა.
მისი ინფორმაციით, კლინიკაში შეიყვანეს ექვსი ადამიანი, აქედან ერთი გარდაცვლილია (პოლიციის თანამშრომელი), ერთი პირი მძიმე მდგომარეობაშია და ის თბილისში გადაიყვანეს. ოთხი დაჭრილი საგარეჯოს კლინიკაში რჩება, მათგან ერთის მდგომარეობა შედარებით მძიმეა და მას ოპერაცია ჩაუტარდება. ყველა დაშავებულს აღენიშნება ცეცხლსასროლი იარაღით მიყენებული ჭრილობები.
ექიმის თქმით, დაჭრილები აცხადებენ, რომ მამაკაცმა გამვლელების მისამართით აივნიდან სროლა ატეხა.
რაც შეეხება დაღუპულებს, საგარეჯოს სასწრაფო დახმარების სამსახურის უფროსი ზაზა ქვლივიძე აცხადებს, რომ მისი ინფორმაციით, სროლის შედეგად დაღუპულია სამი ადამიანი. „მთავარი არხი“ ავრცელებს ინფორმაციას ექვსი დაღუპულის შესახებ.
შსს-ს დაღუპულთა ზუსტი რაოდენობის შესახებ ინფორმაცია ჯერ არ გაუვრცელებია.