თბილისი, 6 იანვარი – Sputnik. „ერთიან ნაციონალურ მოძრაობაში“ მიდის შეჯიბრება იმაზე, თუ ვინ უფრო მეტ ცუდს გააკეთებს ან იტყვის, განაცხადა მმართველი პარტია „ქართული ოცნება - დემოკრატიული საქართველოს“ დეპუტატმა, საქართველოს პარლამენტის ვიცე-სპიკერმა გია ვოლსკიმ.
„ნაცმოძრაობაში“ 28-29 იანვარს პარტიის თავმჯდომარის არჩევნები გაიმართება. კანდიდატებს შორის არიან პარტიის მოქმედი თავმჯდომარე ნიკა მელია, პარტიის აქტიური წევრი, პარლამენტის დეპუტატი ლევან ხაბეიშვილი, პარტიის ყოფილი წევრი ნონა მამულაშვილი და არასამთავრობო ორგანიზაცია „მოძრაობა საქართველოსთვის“ თავმჯდომარე გიორგი მუმლაძე.
„ამ ჯგუფს არანაირი რესურსი არ აქვს, საქართველოს უკეთესი პროგრამა და უკეთესი ხვალინდელი დღე შესთავაზოს... შეჯიბრი მიდის, ვინ უფრო მეტი ცუდის გამკეთებელია, ვინ უფრო როყიო განცხადებების გამკეთებელია. ხაბეიშვილი, მელია თუ თავმჯდომარეობის ის მესამე კანდიდატურა, რომლის გვარს ხშირად ვერ იხსენებენ“, - განაცხადა ვოლსკიმ.
მისი თქმით, განცხადებები, რომელიც კეთდება, თავისი შინაარსით მეტყველებს, რომ ეს მოძრაობა „დაცლილია ინტელექტუალური რესურსისგან“.
„ნაციონალური მოძრაობა“ შეთქმულთა ბანაკს დაემსგავსა, რომელსაც ერთი კონკრეტული ამოცანა აქვს - დესტაბილიზაცია და ისეთი რყევების გამოწვევა, რაც მათი აზრით, მთავრობას შეცვლის“, - განაცხადა ვოლსკიმ.
მისი თქმით, როდესაც პარტიას არ გააჩნია რესურსი, „ყველაზე ადვილია დესტრუქციაზე საუბარი“.
„ვიომოთ იმისთვის, რათა ხელისუფლება შეიცვალოს, ხოლო ხელისუფლება შეიცვალოს, რათა გავყვეთ იმ გეგმას, რაც შემუშავებულია, მათ შორის მეორე ფრონტის გახსნის საკითხთან დაკავშირებით“, - ასე ახსნა ვოლსკიმ „ნაცმოძრაობის“ წარმომადგენელთა განცხადებები.
პარტიის თავმჯდომარის არჩევნები დაინიშნა მას შემდეგ, რაც პარტიული ლიდერების ნაწილი მელიას ღიად დაუპირისპირდა. შემდგომში ბრძოლა მელიას თავშეკავებული პოლიტიკის მომხრე ბანაკსა და „ძველ გვარდიას“ შორის, რომელსაც სათავეში ლევან ხაბეიშვილი უდგას, კიდევ უფრო გამწვავდა.
მთავარ ოპოზიციურ პარტიაში კონფლიქტზე და თავმჯდომარის შესაძლო შეცვლაზე პირველად კულუარებში 2021 წელს, საქართველოში ყოფილი პრეზიდენტის მიხეილ სააკაშვილის დაბრუნების შემდეგ ალაპარაკდნენ.
ე.წ. ძველი გვარდია და სააკაშვილის მხარდამჭერები უკმაყოფილო დარჩნენ პარტიის მოქმედებით ყოფილი პრეზიდენტის დაკავების შემდეგ და მასმედიასთან არაერთხელ განაცხადეს, რომ პარტია უფრო აქტიური უნდა ყოფილიყო დამფუძნებლის გათავისუფლების საკითხში.
ამასთან, ნიკა მელია, მართალია, აცხადებდა, რომ სააკაშვილის გათავისუფლება მისთვის პრიორიტეტია, ხშირი კონტაქტი მასთან არ ჰქონია. პარტიას არც პარლამენტი დაუტოვებია და არ გადაუდგამს რადიკალური ნაბიჯები ექს-პრეზიდენტის მოწოდებების მიუხედავად.
„ერთიანმა ნაციონალურმა მოძრაობამ“ ბოლო ერთი წლის განმავლობაში პოზიციები შესამჩნევად დათმო. ბოლო გამოკითხვების მიხედვით, მისი მხარდაჭერა 7%-დან 12%-მდე მერყეობს, 2022 წლის დასაწყისში კი 9-15%-ის დონეზე იყო.