თბილისი, 21 თებერვალი – Sputnik. საქართველოს მთავრობამ ორშაბათს სხდომაზე მიიღო დადგენილება შიდა და ქვემო ქართლში მზის ელექტროსადგურებისა და ჰიდროელექტროსადგურების შექმნის შესახებ.
საქართველოსთვის ენერგოუსაფრთხოება და ენერგოდამოუკიდებლობა მნიშვნელოვან გამოწვევად რჩება. ქვეყნის ხელისუფლება აქტიურად მუშაობს ყოველწლიურად მზარდი ელექტროენერგიის მოხმარების დაფარვაზე.
„მზის ელექტროსადგურის მშენებლობა დაგეგმილია შიდა ქართლში, ხოლო ოთხი ჰიდროელექტროსადგურის – ქვემო ქართლის რეგიონში“, – ნათქვამია მთავრობის ადმინისტრაციის პრეს-სამსახურის განცხადებაში.
სულ ხუთივე სადგურის მშენებლობაზე გათვალისწინებულია15 მლნ აშშ დოლარამდე ინვესტიცია.
საქართველოში 2022 წელს ექსპლუატაციაში 10 ახალი ჰიდროელექტროსადგურის გაშვება იგეგმება. მათი საერთო დადგმული სიმძლავრე 30 მეგავატია.
საუბარია მცირე და მიკროჰესებზე, რომლებშიც 120 მილიონ ლარზე მეტი ინვესტიცია განხორციელდა. ასევე იგეგმება ახალი კომბინირებული ციკლის თბოსადგურის მშენებლობის დაწყება. კვლევის დასრულების შემდეგ ქვეყანა გადავა პილოტირებაზე უახლესი ტექნოლოგიის „მწვანე“ წყალბადის გამოყენების მიმართულებით. საქართველო პირველია რეგიონში, სადაც ამ ტექნოლოგიების პილოტირება მოხდება.
ეკონომიკის სამინისტროს ინფორმაციით, 2021 წელს მცირე და საშუალო ენერგეტიკული ობიექტების მშენებლობაზე 37 ახალ შეთანხმებას მოეწერა ხელი. ესენია მცირე ჰესები, ქარისა და მზის სადგურები. საუბარია ჯამში 524 მეგავატის დადგმულ სიმძლავრეზე.
მზარდი მოხმარება
საქართველოში ელექტროენერგიის მოხმარება წლიდან წლამდე იზრდება. ექსპერტები მიიჩნევენ, რომ 2030 წლისთვის ელექტროენერგიის მოხმარება თითქმის 70%-ით გაიზრდება და 22 მილიარდ კვტ/სთ-ს მიაღწევს. დღეს ეს მაჩვენებელი წელიწადში 13 მილიარდის დონეზეა.
ელექტროენერგეტიკული ბაზრის ოპერატორის (ESCO) მონაცემებით, საქართველოში 2021 წელს 15,3 მლრდ კვტ/სთ ელექტროენერგია მოიხმარეს, რაც 2020 წელთან შედარებით 23,5%–ით მეტია. ამავე პერიოდში გამომუშავდა 12,6 მლრდ კვტ/სთ.
გამომუშავებული ენერგიის დიდი წილი ჰიდროელექტროსადგურებზე მოდის – 10,2 მლრდ კვტ/სთ. თბოელექტროსადგურების მიერ გამომუშავებულია დაახლოებით 2,4 მლრდ კვტ/სთ, ქართლის ქარის სადგურმა კი 83,4 მლნ კვტ/სთ გამოიმუშავა.
საქართველოში ელექტროენერგიის დეფიციტის შევსება ხდებოდა მეზობელი ქვეყნებიდან განხორციელებული იმპორტის ხარჯზე.
გასულ წელს საქართველოში იმპორტირებულია 2 მილიარდზე მეტი კვტ/სთ ელექტროენერგია, მათ შორის რუსეთიდან 1,2 მლრდ კვტ/სთ, თურქეთიდან – 161,2 მლნ კვტ/სთ, აზერბაიჯანიდან კი 600,1 მლნ კვტ/სთ ელექტროენერგია.
ექსპორტმა აღნიშნულ პერიოდში 391 მლნ კვტ/სთ შეადგინა.