თბილისი, 9 იანვარი - Sputnik. ხუთშაბათს, დღისით ბიტკოინის ღირებულება 8,3%-ით დაეცა, მაჩვენებელი 43 ათას დოლარზე დაბლაა, ამაზე გასული კვირის ვაჭრობის მონაცემები მეტყველებს.
ექსპერტები ფასის ვარდნის მთავარ მიზეზად ყაზახეთში განვითარებულ მოვლენებს უკავშირებენ. კერძოდ, ქვეყანაში ინტერნეტის გათიშვამ გამოიწვია კრიპტოვალუტის პოზიციების ვარდნა და სერიოზული დანაკარგი.
კემბრიჯის უნივერსიტეტის შეფასებით, ყაზახეთს ბიტკოინის მაინინგის მოცულობით მსოფლიოში მეორე ადგილი უკავია, მისი წილი 18,1%-ია. პირველ ადგილზეა აშშ - 35,4, მესამეზე კი რუსეთი -11,2%.
გასულ წელს ჩინეთმა სრული აკრძალვა დააწესა კრიპტოვალუტის მოპოვებასა და მის გამოყენებაზე. შედეგად, მაინინგური აპარატურა და კომპიუტერები სხვა ქვეყნებში გაიტანეს და მათი მოგება მნიშვნელოვნად გაიზარდა.
პროტესტი ყაზახეთში
მასობრივი პროტესტი ყაზახეთში 2022 წლის პირველ დღეებში დაიწყო. ნავთობის მწარმოებელი მანგისტაუს რეგიონის ქალაქ ჟანაოზენისა და აქტაუს მოსახლეობამ თხევადი გაზის ფასების ორჯერ გაზრდა გააპროტესტა. შემდეგ კი პროტესტი სხვა ქალაქებშიც გავრცელდა. 4, 5 და 6 იანვარს დემონსტრანტებსა და ძალოვანებს შორის შეტაკებები მოხდა, არიან გარდაცვლილები. ქალაქს დიდი ზარალი მიადგა, გაქურდულია მაღაზიები, ოფისები, ბანკომატები.
ქვეყნის მთელ ტერიტორიაზე 19 იანვრამდე საგანგებო მდგომარეობაა გამოცხადებული.
5 იანვრის დილით პრეზიდენტმა ტოკაევმა მთავრობა გადააყენა და კოლექტიური უსაფრთხოების ხელშეკრულების ორგანიზაციას (ОДКБ) სთხოვა დახმარება „ტერორისტული საფრთხის დასაძლევად“. ორგანიზაციამ მალევე გადაწყვიტა კოლექტიური სამშვიდობო ძალების გაგზავნა ყაზახეთში, რომელიც, გავრცელებული ინფორმაციით, იქ შეზღუდული დროით დარჩება.