თბილისი, 23 დეკემბერი – Sputnik. აშშ-ის სურსათისა და წამლების სააგენტომ (FDA) კორონავირუსული ინფექციის სამკურნალო პრეპარატი Paxlovid-ი დაამტკიცა, რომელიც კომპანია Pfizer-მა დაამზადა, ნათქვამია მარეგულირებლის საიტზე.
FDA-ს განცხადებით, Paxlovid-ი პირველი პერორალური პრეპარატია, რომლის გამოყენებაც ნებადართული გახდა აშშ-ში. კორონავირუსზე დადებითი ტესტის შემთხვევაში მისი მიღება 12 წლის ასაკიდანაა შესაძლებელი, თუ სხეულის წონა 40 კგ-ზე მეტია.
პრეპარატი უპირველესად რეკომენდებულია მათთვის, ვისაც COVID-19-ის მძიმე ფორმის განვითარების რისკი აქვს. Paxlovid-ი გაიყიდება რეცეპტით და ის ავადმყოფმა სიმპტომების გაჩენიდან ხუთი დღის განმავლობაში უნდა მიიღოს.
როგორც მანამდე განაცხადა კომპანია Pfizer-მა, პრეპარატის საბოლოო გამოცდამ, რომელშიც 2.250 ინფიცირებული იღებდა მონაწილეობას, დაადასტურა, რომ Paxlovid-ი ჰოსპიტალიზაციისა და სიკვდილის რისკს 89%-ით ამცირებს. კომპანიაში ხაზს უსვამენ, რომ უკვე გამოცდის მეორე ფაზის დროს არცერთი ლეტალური შემთხვევა არ დაფიქსირებულა.
FDA-ს წარმომადგენელ პატრიცია კავაცონის თქმით, Paxlovid-ი „COVID-19-თან ბრძოლის ახალი ინსტრუმენტია პანდემიის კრიტიკულ მომენტში, როდესაც ახალი შტამები ჩნდება“, და ის მკურნალობას ბევრად ხელმისაწვდომს გახდის.