თბილისი, 10 დეკემბერი - Sputnik. საქართველოს მთავრობამ უნდა მიიღოს ზომები მარცვლის ბაზრის დასარეგულირებლად, რათა არ დაუშვას პურის გაძვირება, განაცხადა საქართველოს ხორბლისა და ფქვილის მწარმოებელთა ასოციაციის ხელმძღვანელმა ლევან სილაგავამ.
რუსეთი უკვე მრავალი წელია, საქართველოსთვის ხორბლის მთავარი მომწოდებელია. ამიტომ რუსეთში მარცვლის ექსპორტზე გადასახადის გაზრდა ქვეყნისთვის შეშფოთების საფუძველია.
რუსეთიდან მარცვლის ექსპორტზე საბაჟო გადასახადი 8-დან 14 დეკემბრის ჩათვლით ერთ ტონა პროდუქციაზე 84,9 დოლარი იქნება. რუსეთის სოფლის მეურნეობის სამინისტროს ინფორმაციით, ხორბლის ექსპორტზე საბაჟო გადასახადი 15-დან 21 დეკემბრის ჩათვლით კვლავ გაიზრდება და ერთ ტონაზე 91 დოლარი იქნება.
„ვფიქრობ, მნიშვნელოვანია, რომ საქართველოს ეკონომიკურმა გუნდმა მიიღოს დროული გადაწყვეტილება, რათა თავი დაიზღვიოს პურის შესაძლო გაძვირებისგან“, - განუცხადა სილაგავამ Sputnik-საქართველოს.
სილაგავას თქმით, მთელ მსოფლიოში ხორბლის ფასი განპირობებულია მოლოდინით, რა გადაწყვეტილებებს მიიღებს რუსეთი ხორბლის ექსპორტზე გარკვეული შეზღუდვების დაწესების შესახებ.
გარდა ამისა, ექსპერტი საუბრობს საქართველოსთვის კიდევ ერთ პრობლემაზე - ესაა უახლოეს მომავალში მოხმარებული ელექტროენერგიის სუბსიდირების პროგრამის დასრულება, რომელიც ადამიანისთვის ყველაზე საჭირო პროდუქციის წარმოების თანადაფინანსებას ითვალისწინებს.
ფსონი ფქვილზე
ხორბლის გაძვირება საერთაშორისო ბაზრებზე ზაფხულიდან დაიწყო. ხუთ თვეში ერთი ტონა ხორბალი 240-დან 350 დოლარამდე გაძვირდა. ამიტომ ქართული პურკომბინატებისთვის აღარაა ხელსაყრელი ხორბლის გადამუშავება და ფქვილის ადგილზე დამზადება.
მით უფრო, რომ მარცვლეულის ფასი იზრდება რუსეთის მხრიდან საბაჟო ტარიფის მატების ხარჯზეც. საქართველოს ფქვილის დიდი ნაწილიც, ძირითადად, რუსეთიდან შემოაქვს, მაგრამ ეს პროდუქტი საექსპორტო ბაჟით არ იბეგრება.
წლის დასაწყისიდან 9 თვეში ხორბლის იმპორტი 15,6%-ით შემცირდა. ქვეყანაში 67,8 მილიონი დოლარის ღირებულების 282,8 ათასი ტონა მარცვალი შემოიტანეს. ხორბლის იმპორტის შემცირების პარალელურად ხორბლის ფქვილის იმპორტი ორჯერ გაიზარდა. მიმდინარე წლის იანვარ-სექტემბერში 4,9 მილიონი დოლარი დაიხარჯა 16,4 ათასი ტონა ფქვილის შესაძენად. შესაბამისად, იმპორტი გაიზარდა 115,5%-ით.
მიუხედავად ფქვილის იმპორტის რეკორდული ზრდისა, საქართველოს ორი თვის ხორბლის მარაგი აქვს.
ერთი წლის განმავლობაში საქართველო 700-800 ათას ტონა ხორბალს მოიხმარს. აქედან მხოლოდ 10%-ია ადგილობრივი წარმოების. დანარჩენი ქვეყანას შემოაქვს რუსეთიდან, ყაზახეთიდან, უკრაინიდან და აშშ-დან. რუსეთზე მოდის ამ ხორბლის იმპორტის 70%. მისი ფასი საქართველოსთვის ყველაზე ხელსაყრელი იყო.