თბილისი, 7 დეკემბერი − Sputnik. ხაჭოს ყოველდღიური მიღება სასიკეთო გავლენას ახდენს ძვლების, ღვიძლის, კუნთების მდგომარეობაზე და ამასთან, გარდა იმისა, რომ აწესრიგებს ძილს, ადამიანს გახდომაშიც ეხმარება, აცხადებს ექიმი-დიეტოლოგი ოლგა კორაბლიოვა.
მისი თქმით, ხაჭოში დიდი რაოდენობით შედის ტრიპტოფანი − ამონომჟავა, რომელიც ადამიანს უძილობისგან, შფოთვისა და დეპრესიებისგან იცავს. გარდა ამისა, პროდუქტი მდიდარია კალციუმითა და ფოსფორით, რომელიც აღკვეთს კბილების პრობლემებს, ამაგრებს ძვლებს, აუმჯობესებს თმისა და ფრჩხილების მდგომარეობას.
ექიმი ხაზს უსვამს, რომ 9% ცხიმიანობის მქონე ხაჭოს 100 გრამში სულ 169 კალორია და 16% ცილა შედის, რის გამოც ის ადამიანს მალე ანაყრებს.
„გამომდინარე აქედან, ზედმეტი საკვების მიღება თითქმის სრულიად გამოირიცხება. თუ მენიუში ხაჭოს შეიტანთ, უფრო ნაკლებს შეჭამთ, ვიდრე ჩვეულებრივ ჭამთ ხოლმე“, − განმარტა კორაბლიოვამ.
ექიმი განსაკუთრებულად უსვამს ხაზს, რომ თუ ადამიანი რეგულარულად მიირთმევს ცხიმიან საკვებს (ფასტფუდებს, შემწვარ პროდუქტს, ტკბილეულსა და ფქვილოვან ნაწარმს), ღვიძლის უჯრედები ნელ-ნელა გადაგვარდება ცხიმოვან ქსოვილად.
„დაავადებას ასეც ჰქვია − ღვიძლის გაცხიმოვნება. ხაჭო კი შეიცავს ამინომჟავა მითეონინს, რომელიც პოზიტიურად მოქმედებს ცხიმგაცვლაზე და, გარდა ამისა, ამცირებს ცუდ ქოლესტერინს სისხლში“, − აღნიშნა ექიმმა.
მანამდე მედიცინის მეცნიერებათა დოქტორმა, დიეტოლოგმა მარია მუხინამ განმარტა, რომ ხაჭო ერთ-ერთი ყველაზე ჯანმრთელი და პოპულარული ფერმენტირებული რძის პროდუქტია, მაგრამ მისი სარგებელი დამოკიდებულია იმაზე, თუ რასთან ერთად და როდის მიირთმევთ მას.