თბილისი, 29 ნოემბერი — Sputnik. დიდი ბრიტანეთი, რომელიც მიმდინარე წლის ბოლომდე „დიდი შვიდიანის“ თავმჯდომარე ქვეყანაა, G7-ის წევრი სახელმწიფოების ჯანდაცვის მინისტრების სამიტს იწვევს კორონავირუსის ახალი შტამის „ომიკრონის“ ირგვლივ არსებულ ვითარებაზე სამსჯელოდ, იუწყება Deutshce Welle.
გაერთიანებული სამეფოს მთავრობის პრეს-სამსახურის ცნობით, სამიტი 29 ნოემბერს გაიმართება.
ლონდონმა ოპერატიულად უპასუხა „ომიკრონის“ პირველი შემთხვევების გამოვლენას ევროპაში და უკვე გამოაცხადა დამატებითი შემზღუდავი ზომები მოსახლეობის ახალი შტამით ინფიცირებისგან დასაცავად. 30 ნოემბრიდან ქვეყანაში სავალდებულო გახდება პირბადის ტარება საზოგადოებრივ ტრანსპორტში, მაღაზიებში, ბანკებში, სილამაზის სალონებსა და სხვა ადგილებში.
გარდა ამისა, ქვეყანაში ჩამსვლელები ვალდებული იქნებიან გაიკეთონ PCR–ტესტი საზღვრის გადაკვეთიდან პირველი ორი დღის განმავლობაში და უარყოფითი პასუხის მიღებამდე დარჩნენ იზოლაციაში.
კორონავირუსის ახალი ვარიანტი „ომიკრონი“
კორონავირუსის ვარიანტი B.1.1.529, რომელსაც ჯანმრთელობის მსოფლიო ორგანიზაციამ ბერძნული ანბანის მე-15 ასოს მიხედვით „ომიკრონი“ უწოდა, ბოტსვანასა და სამხრეთ აფრიკის რესპუბლიკაში 2021 წლის ნოემბრის ბოლო რიცხვებში გამოვლინდა.
მეცნიერების თქმით, გამომდინარე იქიდან, რომ ახალი შტამის მომჭიდებელი ცილა უჩველოდ დიდი რაოდენობის, 32 მუტაციას მოიცავს, ეს ვარიანტი შესაძლოა უფრო გადამდები იყოს, ვიდრე ამ დროისათვის დომინანტი „დელტაა“.
ჯანმომ ახალი ვარიანტის მსოფლიოში გავრცელების რისკი შეაფასა როგორც „ძალიან მაღალი“. ამასთან აღინიშნა, რომ „ომიკრონით“ გარდაცვალების შემთხვევა ჯერჯერობით არსად არ დაფიქსირებულა, თუმცა არ გამოირიცხება, რომ კორონავირუსის ამ ვარიანტით ისინიც დაინფიცირდნენ, ვინც უკვე გადაიტანა COVID-19.