თბილისი, 18 ნოემბერი — Sputnik. თბილისის მერი კახა კალაძე მიიჩნევს, რომ პატიმრობაში მყოფი ყოფილი პრეზიდენტი მიხეილ სააკაშვილი რიგითი პატიმარია და მისთვის გაუგებარია, რატომ უნდა ჩაითვალოს ის განსაკუთრებულ პატიმრად.
კალაძე პრეზიდენტ სალომე ზურაბიშვილის გუშინდელ გამოსვლას გამოეხმაურა, რომელმაც განაცხადა, რომ საქართველოს ექს-პრეზიდენტი მიხეილ სააკაშვილი პრეზიდენტის ინსტიტუტის სიმბოლოს წარმოადგენს, განსაკუთრებული პატიმარია და განსაკუთრებულ დამოკიდებულებასა და ყურადღებას მოითხოვს.
ექს-პრეზიდენტმა სააკაშვილმა შიმშილობა დაკავების დღეს, 1 ოქტომბერს გამოაცხადა. ჯანმრთელობის გაუარესების რისკის მიზეზით ექს-პრეზიდენტი გლდანის ციხის საავადმყოფოში გადაიყვანეს. თავად პრეზიდენტი და მისი მხარდამჭერები მის გადაყვანას სამოქალაქო კლინიკაში მოითხოვენ.
„პირველად გავიგე, ასეთი რამ თუ არსებობდა. პატიმარი არის პატიმარი, ის არის ადამიანი, ვინც დანაშაულს სჩადის. ადამიანს აქვს დანაშაული ჩადენილი და, რა თქმა უნდა, მას მოუწევს კანონის წინაშე პასუხისგება იმ ვადით, რაც აქვს მისჯილი“, – განაცხადა კალაძემ.
თბილისის მერმა ჟურნალისტებთან ასევე სააკაშვილის რუსთავის მე-12 სასჯელაღსრულების დაწესებულებიდან ციხის კლინიკაში ეტაპირების კადრების შესახებაც ისაუბრა, რომელიც 11 ნოემბერს საქართველოს პენიტენციურმა სამსახურმა გაავრცელა.
კალაძის განცხადებით, სააკაშვილმა წინააღმდეგობა გაუწია პენიტენციური სამსახურის თანამშრომლებს და ისინი იძულებული გახდნენ ასეთი ფორმებით გადაეყვანათ ის ციხის კლინიკაში.
მერის თქმით, აღნიშნული კადრების გავრცელებას პირველ რიგში ჟურნალისტები და მისი უფლებადამცველები ითხოვდნენ და პენიტენციურმა სამსახურმა სააკაშვილის რუსთავის მე-12 დაწესებულებიდან გლდანის მე-18 დაწესებულებაში გადაყვანის კადრები მხოლოდ მათი დაჟინებული მოთხოვნის შემდეგ გამოაქვეყნა.
ციხის კლინიკაში სააკაშვილის ეტაპირების კადრებზე გამოძიება დაიწყო სახელმწიფო ინსპექტორის სამსახურმა. ისინი შეისწავლიან სააკაშვილის მიმართ განხორციელებული არაადამიანური მოპყრობის შესაძლო ფაქტებს და ვიდეოკადრების გასაჯაროების კანონიერებას.
სააკაშვილმა სახელმწიფო საზღვარი არალეგალურად გადმოკვეთა და ის თბილისში 1 ოქტომბერს დააკავეს. საქართველოში ექს-პრეზიდენტის წინააღმდეგ ხუთი სისხლის სამართლის საქმეა აღძრული. ორ საქმეზე იგი დამნაშავედ არის ცნობილი, კიდევ სამი საქმე კი განხილვის სტადიაშია. საქართველოს მესამე პრეზიდენტი საკუთარ თავს პოლიტპატიმარს უწოდებს, ხოლო მის წინააღმდეგ აღძრულ საქმეებს – გაყალბებულს.