თბილისი, 10 ნოემბერი — Sputnik. „მწვანე პასპორტი", რომლის წყალობითაც საქართველოში 1 დეკემბრიდან შესაძლებელი იქნება კაფეებში, რესტორნებსა და სპორტდარბაზებში სიარული და კონცერტებზე დასწრება, ხელმისაწვდომია უცხოელი მოქალაქეებისთვისაც.
ასეთი პასპორტის მიღება მარტივია როგორც საქართველოს, ისე უცხოეთის მოქალაქისთვისაც, თუ მას ჩატარებული აქვს ვაქცინაცია, ან ჩატარებული აქვს 72-საათიანი PCR-ტესტი, ან გადატანილი აქვს კორონავირუსი
ე.წ. კოვიდ-პასპორტის მისაღებად საჭიროა ან იუსტიციის სახლში მისვლა, სადაც პასპორტის ან პირადობის მოწმობის წარდგენის შემდეგ შეამოწმებენ მონაცემებს და გასცემენ სასურველ საბუთს, ან შეიძლება შესვლა სპეციალურ ვებ-გვერდზე https://covidpass.moh.gov.ge.
ვებ-გვერდზე უცხოეთის მოქალაქემ უნდა აირჩიოს ინგლისური ენა, შეავსოს ფორმა (სახელი, გვარი, პასპორტის ნომერი), მათ შორის, მიუთითოს საქართველოში მიღებული ტელეფონის ნომერი. რეგისტრაციის გასავლელად საჭიროა ტელეფონის ნომერზე მიღებული კოდის შეყვანა. ამით რეგისტრაცია დასრულდება.
ყურადღება უნდა მიექცეს იმას, რომ წარწერა QR-კოდის ქვეშ მწვანე უნდა იყოს. ამ შემთხვევაშია კოვიდ-პასპორტი მოქმედი.
1 დეკემბრიდან მოქალაქეები სხვადასხვა ობიექტებში - კვების ობიექტები, რესტორნები, კაფე-ბარები, კინოთეატრები, ოპერა, მუზეუმები, საკონცერტო დარბაზები, გასართობი ცენტრები, სამორინეები და სათამაშო ბიზნესის ობიექტები, სპა-ცენტრები, ფიტნეს-დარბაზები, სასტუმროები - მხოლოდ და მხოლოდ „მწვანე პასპორტით" შეძლებენ შესვლას. აღნიშნული მოთხოვნა გავრცელდება მხოლოდ ობიექტების სტუმრებზე და არა პერსონალზე.
„მწვანე პასპორტის" მოთხოვნა იმოქმედებს 18 წელს ზემოთ მოქალაქეებისთვის, ასევე ტურისტებისთვის.